admin
YiNtatheli kaMthunywa
UMAQHUZU wePremier Soccer League uKennedy Ndebele usetshayele umpululu umdlali wakuleli uKhama Billiat obuthe izicoco zonke kuligi yeAbsa eSouth Africa.
UNdebele ubike ngezinga eliphezulu ukuthi okwenziwe nguBilliat kuyisibonelo sokuthi inguqu yakuleli ngeyonhlonzi lokuthi iZimbabwe ilethalenta elibatshazwa umhlaba wonke.
“Simtshayela ihlombe uKhama Billiat ngokwenza kuhle kumdlalo wenguqu,” nguNdebele lo.
UDazzy Kapenya umdlali owadla ubhedu kuHighlanderes uthe ukunqoba kukaBilliat kutshiya abasakhulayo belomlandu wokwenza ngcono kuminyaka elandelayo.
“Abasakhulayo abakubone njengomzekeliso wokuthi labo bangakwenza lokhu. Akulula ukuvotelwa njengomdlali odlule bonke kumaligi alomncintiswano. UKhama Billiat usijabulise sonke,” nguKapenya lo.
Kuliviki uBilliat ubengomunye wabadlali ababeyinsika yeqembu leMamelodi Sundowns wazibuthela izicoco ezintathu ezibalulekileyo ku-Absa Premiership, waphinda wathola imali engange R450 000.
Uthole izicoco ezibalisa owePSL Footballer of The Season (R250 000), Absa Premiership Players’ Player of The Season (R150 000) lowe-Absa Premiership Midfielder of The Season (R50 000). Kuzicoco lezi, uBilliat wehlule abanye abadlali beSundowns uKeagan Dolly loHlompho Kekana.
Ngaphandle kwalokhu, uKhama ubengumdlali weZimbabwe wesine ukuthola isicoco saphezulu eSouth Africa.
Ulandele uWilfred Mugeyi (1996/1997), uBenjani Mwaruwari (2000/2001) loTinashe Nengomasha (2003/2004) abake bathola isicoco lesi.
UBilliat ovotelwe ngabaqeqetshi labadlali bamaqembu ehlukeneyo angu-16 kuPremiership.
Online Reporter