admin
Buhlebenkosi Gaule
ABALIMI besigabeni seZenzele eTsholotsho bathole ulwazi lokulondoloza umhlabathi njalo okuyindlela ezabalethela isivuno esingcono.
Abalimi beZenzele babelwe ulwazi lokusebenzisa indlela yokulima ye-conservation farming yinhlanganiso yeAgritex ekuqaleni kukaNkwenkwezi ngemva kokuba abanye babo bethole ulwazi olufanayo kunhlanganiso yeCultivating New Frontiers in Agriculure (CNFA) nyakenye.
Ku-conservation agriculture abalimi bakhuthazwa ukuba bengatshisi amahlanga besenzela ukubulala izinanakazana ezihlasela izilimo kodwa kumele bawekele abengumquba besebehlanyela ezinye izilimo ezehlukene lalezo ebezihlanyeliwe ngoba lokhu lakho kuxotsha izinanakazana lezo.
Abalimi bakhuthazwe ukuba basebenzise i-conservation agriculture ngoba abalimi bangasebenzisa indlela le balakho ukuthola isivuno esingcono njalo lokhu akudingi ukuthi basebenzise imitshina emikhulu ngoba ibulala ukudla kwezilimo lomhlabathi.
Abalimi besigabeni seTsholotsho eZenzele bakhuthazane ukuba basebenzise ulwazi abalutholayo lokugcina kuhle umhlabathi wabo kusenzelwa ukuthi lokhu kuncedise umhlabathi ukuba uphume lesivuno esihle.
Kubikwa indlela le yokulima ifuna abalimi basebenze ndawonye njengamaqembu amancane alabantu abangaba litshumi. Lokhu kwenza umsebenzi wokulima ubelula.
Omunye wabalimi besigabeni seZenzele eTsholotsho uNkosazana Cecilia Ncube ofunde ngendlela le yokulima uthe izabaphathisa ukuthi balondoloze umhlabathi wabo.
“Kusukela khathesi abalimi abanengi sebezalima ngonanzelelo besenzela ukuba bengabulali umhlabathi abalima kuwo njengoba sebefundile ukuthi indlela le yokulima yenza sithole isivuno esingcono,” kutsho uNkszn Ncube.
UNkszn Ncube uchaze ukuba nge-conservation agriculture abalimi abamelanga bazikhathaze ngokukhipha amahlanga emasimini ngoba ayanceda ukuba amahlahla lawa avikele umhlabathi ukuba ungakhukhulwa ngumoya kumbe ngamanzi.
“Nxa umlimi engasebenzisa le indlela okuthiwa yi -conservation agriculture kutsho ukuthi akasoze adinge umtshina omkhulu ongakhupha amahlahla. Lokhu kuzamnceda ukuba angabi lendleko ezinengi njalo lindlela ayisoze imdlele isikhathi esinengi,” kutsho uNkszn Ncube.
“Lokhe ngaqala ukusebenzisa lindlela esayifundiswa yinhlanganiso Agritex sengithola isivuno esingcono,” kuphetha uNkszn Ncube.
Online Reporter