Online Reporter
Lovemore Dube
UMANEJA weHighlanders uZenzo Moyo usebeke isicelo sokuthula phakathi kwabalandeli beBosso ngemva kokuba iqembu selidlale imidlalo emine liphuma lingutshiki lobhanqa kuCastle Lager Premier Soccer League.
Impumela le kayithabisanga ezinye inhlangathi zabalandeli, njalo umqeqetshi uBenjani Mwaruwari uke wajikijelwa ngesigubhu ngomunye umlandeli kumdlalo odlalwe phakathi kweviki edluleyo.
IHighlanders ibe ngutshiki lobhanqa leBulawayo Chiefs ekhaya, kwalandelwa ngomdlalo owaphela kuyi 2-2 eRufaro Stadium leDynamos lapho uMongameli Tshuma aphakamisa ithalenta lakhe.
Kwathi kumdlalo leMWOS akuzange kuhlohlwe kumaqembu womabili, okwabangela ukukhathazeka kubalandeli mayelana lokungafiki kwabhola egedini.
UMoyo uthe: “IRome kayizange yakhiwe ngosuku olulodwa. Kasibekezeleni, sonke sizwa ubuhlungu kodwa sakha into esizayijabulela sonke.”
Uthe iqembu lilombono ocacileyo, njalo bayajabula ngokuguquka kwalo ngaphansi komqeqetshi omutsha. Uthe kubalulekile ukuqaphela ukuthi umqeqetshi waphuza ukufika eqenjini, ngakho wonke umqeqetshi kumele akhethe abadlali abahambelana lombono wakhe.
“Okokuqala, umqeqetshi uze eqenjini sekwadlula isikhathi. Ngaphandle kwalokho, wabuye wadinga abanye abadlali ayebafuna bokwengeza iqembu, abasebedonswe ngamanye amaqembu, kukanti abanye basebetshiyile iqembu.
“Okujabulisayo yikuthi laba esilabo yibo abangamangalisa kakhulu, basebenza kanzima nsuku zonke ukuze bathuthuke. Bafuna ukuphumelela, okuyinzuzo enkulu eqenjini,” kutsho uMoyo, ongomunye wabadlali abahamba phambili kuHighlanders njalo wathola umklomelo weZimbabwe Footballer of the Year ngo-2000.
Uthe umbono wokuphumelela eqenjini uhlezi ukhona, njalo kulindwe impumela engcono njengoba isizini iqhubeka. UMoyo ukhuthaze abalandeli ukuba babe lesineke.
