adminCornelius Luphahla
KUSUKUME ngitsho lesiledolo kusiyananzwa umsebenzi owenziwa yinhlanganiso yeGinyinhlupho ephathisa asebekhulile kanye labaswelayo ngempahla kanye lokudla esikolo seGampunya Primary eNkayi.
IGinyinhlupho khathesi kubikwa yakhela amathuna alabo abafa sebekhulile esigabeni lesi.
Umkhosi lo obukhona mhlaka 5 Lwezi lapho obekumenywe khona abantu abadala endaweni ezitshiyeneyo kunanzwa usuku lwe-International Day for the Eldery ukuba bazoncedisana ekubongeni umsebenzi abawenzileyo kanye lokufundisana langamasiko.
UMthunywa ukhulume loMnumzana Albert Nyoni omunye wamalunga ale inhlanganiso ochaze ukuthi inhlanganiso le yasungulwa kuminyaka engamatshumi amabili lanye ngenjongo yokuncedisa abaswelayo labaphila lobugoga.
“Inhlanganiso le sayisungula ngo1994 ngenjongo yokunceda asebekhulile kanye labaphila lobugoga ngendleko ezitshiyeneyo kanye lokulungisa amathuna abadala. Lokhu sakwenza ngemva kokunanzelela ukuthi abantu laba bathwele nzima ngakho badinga uncedo.
“Uncedo siluthola kunhlanganiso ezizimele zodwa lathi siludlulisele kuzakhamizi ezidinga loloncedo,” kuchaza uMnu Nyoni.
Uqhubeke njalo waveza ukuthi kule inhlanganiso bayafundisana langendlela zamasiko.
“Emhlanganweni wethu kule inhlanganiso siyafundisana ngezamasiko okugoqela ukuphathwa kwabafana, ukuqhutshwa kwemitolo kanye lamanye amasiko. Lokhu sikwenza singabadala bodwa ngoba inhlanganiso le ikhangela kakhulu asebekhulile,” kuveza uMnu Nyoni.
UMqondisi wenhlanganiso le, uNkosazana Sithabile Nyathi ubikele intatheli ukuthi emkhosini wabo bebezobonga umsebenzi abawenzileyo besakhela amathuna.
“Emkhosini ebe silawo besibonga ukuba senelisile ukwakhela amathuna ezihlobo zethu ezafa sezikhulile. Umkhosi lo ubudinga abantu asebekhulile kuphela kusukela kwabaleminyaka edlula 30 kusiya phezulu.
“Singakenzi umkhosi lo siqale sacela usizo kwezinye inhlanganiso lamankampani agoqela i-Ingwebu ukuze senelise ukuncedisa ekuqhubeni umkhosi lo. Noma nje inhlanganiso yethu isaphila kodwa uhlupho esihlangana lalo yikusweleka kwemali yokuyiqhuba kuhle ngoba khathesi sokunzima ukuthi sigcine asebekhulile ngenxa yokuswela imali. Ngakho isifiso sethu yikuthi ngabe inhlanganiso ezizimele zodwa ziyangenela zisincedise ukuze siqhube kuhle umsebenzi wethu,” kuphetha uNkszn Nyathi.
Online Reporter