Online Reporter
Nkosilathi Sibanda
IBUTHO leZimbabwe National Army (ZNA) selincome ukuziphatha kuhle, ukuhloniphana lokubambana okuvele ngesikhathi semidlalo yeCerta Cito Games ka-2026 eqhutshelwe koBulawayo.
Amaqembu amabutho aphatheke kumidlalo egoqela inguqu, basketball, pool, thenisi lokuqaga.
Ekhuluma emkhosini wokunikeza izicoco kumaqembu labadlali, uMajor General William Dube, onguChief of Staff kugatsha lwe-Economic Development, uthe umncintiswano uhambe kuhle njalo akuzange kube lezehlakalo eziphambanise ukuthula lokuncintisana.
“Lanxa amaqembu ebencintisana ngamandla, akuzange kube lesehlakalo esiphazamise ukubambana lokuthula phakathi kwamasotsha. Lokhu kutshengisa ukuthi isotsha eliqotho kalibonakali ngokunqoba kuphela kodwa ngokuncintisana ngenhlonipho, ukulandela imithetho lokugcina isithunzi somsebenzi,” kutsho uMajor General Dube.
Uncome njalo abeZimbabwe Signals, iSignals Directorate lekomithi ebihlela umncintiswano ngokwenza umsebenzi omuhle. Ubonge le-1 Infantry Brigade ngokuphatha imidlalo.
Uthe umncintiswano uqinise ukubambana, ukusebenza ndawonye lobudlelwano phakathi kwamasotsha.
“Loba uthole umvuzo kumbe hatshi, ukuhlanganyela kwakho kwenze umncintiswano lo waphumelela,” kutsho yena.
Uphinde wabonga abaqeqetshi, onompembe labo bonke abasebenze ukuqinisekisa ukuthi imidlalo ihambe kuhle.
