adminKULESALUKAZI (91) kanye lomzukulu waso oleminyaka emithathu seNsuze eduzane leNdwendwe kweleSouth Africa abaqunywe amakhanda ngenxa yokupheka inyama yenkukhu bengaphiwanga imvumo ngumayithenga.
UHlebekile Ngcobo wajabula kakhulu lapho isihlobo sakhe sithutsha siphethe inyama yenkukhu ngeSonto ngoba sekulesikhathi bacina ukudla ugazana.
Kubikwa waphekela umuli yakhe ukudla okunambithekayo kodwa ngelanga elilandelayo lesi sihlobo sasesithukuthele sigane unwabu okwenza sahle samsusela amanqe lomzukulu wakhe uAnathi Ngcobo.
Umalukazana kaNgcobo, uThembi Maphumulo (38) uthe uninazala wayecabanga ukuthi inyama le ithengelwe ukuthi idliwe.
Kuzwakale ukuba umetheswacala wathetha efica inyama yakhe isiphekiwe wabuza ukuthi ngubani omnike leyomvumo.
UMaphumulo uqhubekele phambili waveza ukuthi umetheswacala waphinda wathembisa ukuquma ingxenye zomzimba kaNgcobo zibe njengamaqatha enkukhu ayeyidlile.
Kuzwakale ukuba emadabukakusa umetheswacala wabonakala egijimisa uNgcobo ebelethe uAnathi ngefotsholo wamtshaya wamquma ngayo andubana acele ezinyaweni.
Abantu benelisa ukubamba umetheswacala bamusa emapholiseni.
Omkhulu wamapholisa uThulani Zwane ukhulume ukuba amacala amabili okubulala asevuliwe, njalo amapholisa asachwayisisa. — Ubulembu
Online Reporter