admin
Samkelo Tshuma/ Ethel Ncube
ZISELE zibambe owangaphansi izakhamizi zeMadabe ePlumtree ngemva kokuba esinye isalukazi sitshayele imali yeMazama Burial Society esikhewini, uMthunywa uyakuveza lokhu lamhlanje.
Kuzwakale ukuthi uPriscilla Dube oleminyaka yokuzalwa engu-61 njalo elilunga leMazama Burial Society wadla imali engange $2 816.
Indaba le ivele ngesikhathi uDube emiswe emthethwandaba weTredgold kuliviki.
Umsolwa uDube kubikwa wayengumgcinisikhwama sale i-burial kusukela ngomnyaka ka2011 kusiya ku2014.
Inkundla izwe ukuba umamangala, obekuyiMazama Burial Society yona ebimelwe nguMnumzana Pilot Ncube, ongumgcinishlalo wayo.
Kuzwakale ukuba amalunga ale inhlanganiso abekhipha imali nyangazonke kumsolwa yena ezisebenzisela engagqize qhakala.
Amalunga kubikwa ukuba ananzelela ukuba kukhona okunuka santungwana abiza amapholisa okwabangela ukugqiziswa izankosi kwalesi salukazi.
Umantshi uNkosikazi Sibongile Msipa-Marondedze ubuze umsolwa ukuthi uyalivuma icala lakhe walivuma.
Umsolwa uphiwe isigwebo sokusebenza emphakathini engaholi okwamaviki ayisithupha.
UNkkz Marondedze uchaze ukuba ukusebenza emphakathini kutsho ukuthi kawonelanga omamangala kuphela kodwa wonele uzulu wonke nje njalo njengomuntu omdala bekumele alandele umthetho ngokugcweleyo.
Umtshutshisi kulelicala bekunguMnumzana Taurai Hondoyemoto.
Online Reporter