admin
Mthokozisi Dube
IZAKHAMIZI zeNemane eTsholotsho ziphakathi kohlelo lokwakha ikilinika endaweni ebizwa ngokuthi kuseNgubo Mlilo.
Kulandela ukuhamba umango owedlula amakhilomitha alitshumi lanhlanu besiya ekilinika yeMadlamombe kumbe eMakhaza izakhamizi zakule indawo zahlala phansi zabumba isu lokwakha ikilinika yazo zincedisana lokhansila.
UKhansila uJonathan Ndlovu uveze ukuthi baqala babopha isu lokuthi umuzi munye ngamunye ukhiphe i$1 ukuze umsebenzi lo uqhutshwe kuhle.
“Ekuqaleni savumelana ukuthi umuzi munye ngamunye ukhipha i$1 ngenyanga kodwa uqale wakhupha imali yokuba lilunga. Kuthe sokubonakale ukuba sasilwisela impucuko esigabeni ikhansili yasinika amasaka ezamende angu-60 kwathi eyinye inhlanganiso ethiwa yiPlan yasipha layo izamende ezingu-90. Kungakho ikilinika yethu sesiqalisile ukuyakha,” kuveza uMnu Ndlovu.
UKhansila uNdlovu ubike ukuba isakhiwo siyathuthuka njalo ulethemba lokuba ngokusebenzelana lezakhamizi, inhlelo zengqubekela phambili zizakwanda kuWadi 11.
“Njengendlela yokwehlisa indleko omama bakha amanzi, obaba yibo abakhayo,” kuchaza uMnu Ndlovu.
UMnu Ndlovu uveze ukuba intuthuko iqala ngezakhamizi hatshi ngabanye abantu abavela phandle.
“Impucuko iqala ngathi njengezakhamizi kungakho sesizamile thina, uhlupho nje yikuswelakala kwamanzi.
UMnu Ndlovu ubike ukuba inhlanganiso ezizimele zodwa zingabaxhasa ukuze isakhiwo sabo singabi liphupho nje kuphela eliphelela emoyeni.
“IMathuphula Hunters layo yathembisa ukusixhasa kungakho silethemba bazafeza isithembiso sabo,” kuphetha uKhansila Ndlovu.
Online Reporter