admin
Ethel Ncube
KULEMULI yelokitshini leCowdray Park koBulawayo ebone into yamehlo kulandela ukubiya indlu yayo nanko phela yathi ivuka ekuseni yathola isalukazi sibhoda lenzomba yaso egumeni, uMthunywa ukuzwile lokhu.
Isiga lesi senzakale ngenyanga ephelileyo lapho enye imuli engathandanga ukuqanjwa ngebizo iveze ukuba ngemva kokuthwaliswa nzima ngabakhunkuli ebusuku yakhetha ukubiya indlu yayo okuyilapho abathi bevuka ekuseni bathola isalukazi okucatshangelwa ukuthi sangena emzini wayo sigqoke isudu yokuzalwa lesambane saso eceleni.
UMthunywa uxhumane lelinye ilunga lemuli eliveze ukuba indaba kagogo owavuka enqunu ngakibo iliqiniso.
“Sasingasabuquthi ngekhaya okwakusenza sihlale sivuka singabakhatheleyo kokuphela okwenza sadinga umphurofethi ukuthi asikhulekele ahluthulele umuzi wethu ngomkhuleko. “Akuhlalanga amalanga amangaki ekuseni omunye ugogo ongumakhelwane wamane watholakala ebhoda egumeni lethu elesambane. Saphangisa sabiza umfundisi owayesikhuleke wabuya wakhuleka wasekhulula ugogo wabuyela emzini wakhe,” kubika ilunga lemuli elingathandanga ukuqanjwa ngebizo.
Wengezelele wathi ugogo lo ngesikhathi etholakala wayehamba bhunyu bhunyu egumeni.
Intatheli ixhumane lomphurofethi Mduduzi Dube wavuma ukuthi wahamba wayabiya umuzi lo ngomkhuleko.
“Angithandi ukukhuluma imfihlo zemzini yabantu ngoba kucina kudala ukuba bangezwani nxa izindaba sezivela emaphepheni kodwa kuliqiniso sibili lindaba yenzakala eCowdray Park.
“Mina ngahamba ngayabiya umuzi lo ngawukhiya ngomkhuleko ngemva kwensukwana nje ngabizwa kuthiwa sokulogogo obhodayo egumeni njalo kasaboni isango angene ngalo. Ngamkhulekela ugogo ngaxotsha amadimoni ayemlandela wasebuyela emzini wakhe. Ngizwa besithi khathesi sowathutha usehlala ekhaya,” kuphetha uMphurofethi uDube.
Online Reporter