Owebiwa ele-8 utholwe esele-53

KUGCWALISEKE isitsho esithi ithemba kalibulali kowesifazane owatshontshwa eleminyaka engu-8, njengoba eseze watholana labakibo eleminyaka engu-53.

Ukuhlangana lomdeni wangakibo ngemva kweminyaka emingaka kube yikufezeka kwephupho lakhe leminyaka uNkosikazi Mathoko Ngubane weDukuduku, eMtubatuba eSouth Africa.

Kumpholise amanxeba enhliziyweni, kwelapheka umphefumulo ezinganeni zakwabo ebezihlala zibalisa ngokuthi kazikwazi ukuthi udadewabo wadliwa yiziphi izintaba.

Yiloba inkulu injabulo emdenini ngokutholana kwezihlobo ezadukelanayo, kodwa okubuhlungu yikuthi unina uze watshiya umhlaba inhliziyo ibhadula ngendodakazi yakhe eyalahleka incane. Ezinsukwini ezedluleyo uNkkz Ngubane uhlangane okokuqala lomdeni wakibo kusukela selokhu walahleka. Uthole lethuba lokuyophosa ilitshe ethuneni likanina.

Ekhuluma lentatheli bekuzwakala ukuthi inhliziyo iyagxumagxuma yinjabulo. Uthe ujabule kakhulu ngokuhlangana labangakibo, yiloba abanye sebatshona.

Ngokuthola kwentatheli umdeni wangakibo kaNkkz Ngubane wawakhe eSiphofaneni, eSwatini, okuyilapho okuthiwa watshontshwa behlala khona.

Watshontshwa yindoda engaziwayo.

Elandisela intatheli uNkkz Ngubane ngelanga lokutshontshwa kwakhe kwafika indoda ethize, yacela indawo yokulala. Kwathi kusisa lindoda yacela ukukhonjiswa indlela eya esitolo — kwabe sekukhitshwa yena ukuba ayiphelekezele ayoyitshengisa isitolo ngoba nguye owayemdala kulabodadewabo ababili uDombi Khumalo, owelanywa ngu-Onoyi Khumalo.

Uthi lindoda yahamba laye ibanga elide, okwathi uma ebuza ukuthi bayaphi kanti ngoba sebedlulile lasesitolo yamtshela ukuthi bayothenga edolobheni. Uthi kwamjabulisa lokho ngoba wayengakaze alubhade edolobheni.

“Sahamba sacina sesigibele imota eyafika yasibeka (ngasemngceleni) maqede seqa ucingo. Saphumela edolobheni engisola ukuthi kusoPhongolo. Sasuka lapho saya eMandeni, okuyilapho safikela emzini wakoMlungwana. Kulumuzi okwakungowamaNazaretha kwakufika abantu abanengi (ababefika bahlale). Sahlala amasonto amabili,” echaza.

Emva kwalawo masonto amabili uthi lindoda yamtshela ukuthi izamtshiya kulumuzi.

“Kulapho engabhoboka khona, ngabatshela kulo muzi ukuthi akuyena ubaba wami lo. Ngabatshela ukuthi ngaphuma ekhaya siyothenga isinkwa sangabe sisabuyela emuva. Kwabizwa amadoda endawo yatshaywa kwathiwa mayichaze (le ndoda) kodwa yangalikhipha iqiniso, maqede yabaleka — ngakhuliswa khona koMlungwana,” elandisa.

Uthi udaba lwakhe luqale ukubhoboka ngo-2016 ngemva kokuba enye yamadodakazi akhe uPhindile Mlungwana, ebiza isibongo “sasekhaya konina” njengoba wayithola engakagani, imbuza ukuthi kungani engafundanga yena njengabanye ontanga yakhe. Ngenxa yokuthi indodakazi yayilokhu ibelesele ngalo mbuzo, wagcina eseyivulela isifuba.

“Ngacina sengiphoqeleka ukuba ngimxoxele umntanami ukuthi akukhona ekhaya kithi koMlungana, lapho bona abazi ukuthi kukogogo wabo. Ngamchazela (umntanami), ngabona ukuthi ingane yami iyahlukumezeka. Iqalile (ngaleso sikhathi) yabhalela emisakazweni lasohlelweni iKhumbul’ekhaya kodwa kwangalunga. Ibe isibhala kuFacebook yabeka indaba njengoba ngayichazela kanti kulengane kamfowethu, uNonhlanhla Myeni, layo esenkundleni okufuniswana kuyo izihlobo ezadukelanayo. Yona le ngane yayibonise uyise wayo uMnu Mfana Myeni osebenzela eWestern Cape. Naye (umfowethu) angimazi, wazalwa ngingasekho ekhaya – sihlukene ngobaba.

Kuhlelwe ukuba sihlangane ngeSonto eledluleyo, kwajatshulwa. Ngithole isimanga sokuthi umuzi kaDombi (udadewabo) ukhona lapha eMfekayi. Sithenga edolobheni elilodwa kodwa kasazani. Bathi labo baze basuka eSwatini ngoba umama wayelokhu ethukwa ngokuthi wathengisa ngengane. Kuthiwa labakoKhumalo bake bafika bezohlola ukuthi lamanje awukatholakali yini umkhondo wale ingane eyalahlekayo, okuyimi. Lokho-ke ngikholwa ukuthi izothobeka inhliziyo kamama njengoba ngikwazile lokubeka itshe ethuneni lakhe kanye lelikadadewethu u-Onoyi,” kuphetha yena.

UNkkz Khumalo, uDombi, weqiwe yinjabulo yokutholana lodadewabo — wehluleka ukuzibamba wakhala.

“Bengiye ngihlale ngithule ngicabanga ngengane kamama eyahamba lomuntu. Kwesinye isikhathi bengike ngizile lokudla ngikhulekela ukuthi ngelinye ilanga sihlangane losisi. Ngihlulekile ukuzibamba ngakhala uma ngimbona ngoba wahamba ngingakazi lutho. Besihlala sichazelwa ngumama ukuthi kulomuntu owafika wathatha ingane yakhe ethi iyomkhombisa lapho ezothenga khona isinkwa. Ngibonga amandla kaNkulunkulu. Lezingane zethu bezingabulalana ngoba zingazani. Makhulu kakhulu amandla kaNkulunkulu. Lamuhla ngiwabonile kimi ngengane kamama — kule minyaka engaka yahamba,” kutsho uNkkz Khumalo.

UNkkz Mlungwana (Phindile), indodakazi kaNkkz Ngubane ubonge bonke ababe lesandla ekutholakaleni komdeni kanina.

Intatheli ayibathintanga abakoMlungwana ngesizathu sokuhlonipha isifiso sikaNkkz Ngubane othe usahlela ukuyobabikela ngokusemthethweni ukuthi usetholene lomdeni wakibo. — Ilanga.