Online Reporter
Nkosilathi Sibanda
INTSHANTSHU zeCastle Lager Premier Soccer League, iScottland FC, izadibana leqembu elikhulu leSouth Africa, iKaizer Chiefs, emdlalweni weToyota Cup ozadlalwa ngeSonto, mhlaka 26 Ntulikazi, eRoyal Bafokeng Sports Palace eRustenburg.
Lo ngumnyaka wesithathu kuqhutshwa linkezo eqinisa ubudlelwano phakathi kweKaizer Chiefs leToyota South Africa Motors, njengengxenye yokulungiselela isizini entsha, ezaqala kumaviki ambalwa alandelayo.
IScottland, eyintshantshu zanyakenye kuCastle Lager Premier Soccer League, izabe ikhokhelwa ngabadlali abaziwayo ababalisa uKnowledge Musona loKhama Billiat, okuzakwenza umdlalo ube ngowokuncintisana okuphezulu.
Umqondisi wezokuthengiselana kuKaizer Chiefs, uJessica Motaung, uthe bayajabula ukuqhubeka lomncintiswano lo.
“Siyathokoza ukubuyisela iToyota Cup okomnyaka wesithathu. Umdlalo lo uqakathekile ekulungiseleleni iqembu lethu lomqeqetshi omutsha ngaphambi kokuqala kwesizini ka-2026/27,” kutsho uMotaung kumbiko wakhe owethulwe ngoLwesithathu ekuseni enkundleni zokuxhumana.
Uthe iKaizer Chiefs ibonga iToyota ngokuqhubeka isekela umdlalo wenguqu lokuphakamisa iqembu labo kunye leRoyal Bafokeng Sports Palace ngokuphatha umdlalo lo.
Ngaphandle kwalumdlalo, kubikwa kuzaba lomunye ozahlanganisa abadlali bakudala phakathi kweKaizer Chiefs Legends leJozi Masters ozaqala emini, ngaphambi kokuthi umdlalo omkhulu uqale ngehola lesithathu emini.
IToyota South Africa izaphinda inikeze omunye wabalandeli bomdlalo imota entsha, iToyota Hilux Double Cab 2.8 GD-6 RB SRX 6AT, ezaphiwa ngesikhathi sekhefu lomdlalo.
IToyota Cup izanceda iKaizer Chiefs ilungiselele isizini entsha kanye lemidlalo yeCAF Confederation Cup, kuthi iScottland ithole ithuba lokuzilinganisa lelinye lamaqembu amakhulu e-Africa.
Kusenjalo, umqeqeqtshi weScottland uNorman Mapeza utshele intatheli ukuthi bazizwa bephakanyisiswe ukunxuswa kuToyota Cup.
Ekhuluma ngemva komdlalo wabo weligi beleHighlanders ngeSonto edluleyo, uMapeza uthe ukubizwa kwabo kumele kubakhukhumeze nanko phela badibana lelinye lamaqembu amakhulu e-Africa.
“Singabe sinqotshiwe yiHighlanders kodwa okukhulu esibhekane lakho yikudlala leKaizer Chiefs kuToyota Cup ngempelaviki. Sizizwa siphakanyisiswe ukubalelwa phakathi kwamaqembu anxuswa kulinkezo,” kutsho uMapeza ngemva kokunqotshwa 1-0 yiHighlander enkundleni yeBarbourfields.
