Online Reporter
Brandon Moyo
ILIGI yeBulawayo Metropolitan Rugby Football Board (BMRFB) Archer Clothing Sevens ka-2025 iqale kakuhle eHartsfield Rugby Grounds ngoMgqibelo odluleyo.
Imidlalo yeSevens iza ngemva kwamaviki amabili kuphethwe umqhudelwano wama-15s, owanqotshwa yi-Old Miltonians (OMs.
Ekhuluma ngemva kokugqitshwa kwesigaba sakuqala semidlalo ngoMgqibelo, umqondisi womqhudelwano uBusani Ncube uthe lanxa kuhambe kuhle, kukhona okusamele kuthuthukiswe ikakhulu ngabesifazane lapho okulamaqembu amathathu kuphela.
“Akuhambanga kuhle, ikakhulukazi ohlangothini lwabesifazane. Besilamaqembu amathathu kuphela bese kusiba leBulldogs ebingafuni ukudlala leWarriors. Kwabesilisa, iMahogany Bulls ibingekho kusigaba sakuqala.
“Umdlalo we-rugby sevens wahlukile kulowe 15s. Amaqembu kumele akuqaphele lokhu,” nguNcube lo.
Kwabesilisa, amaqembu adlalileyo yiOMs, Western Suburbs Panthers, Matabeleland Warriors, Highlanders, Bulldogs, National University of Science and Technology (Nust) leRaiders.
IMatabeleland Warriors, Western Suburbs Panthers leBulldogs zincintisane kuhlandla labesifazane.
Kusenjalo, kukhokhela iOMs ilemiklomelo engu-22, kulandela iPanthers ile-19, kweyesithathu kuleWarriors (17), Bulldogs (13), Nust (12), Raiders (11) leMahogany Bulls ephethe iqanda.
Kubomama iWarriors ile-22, ilandelwa yiPanthers (19) leBulldogs (17).
Kuviki lesibili lemidlalo, amaqembu azahlangana eHartsfield. Imidlalo yama-sevens le kukhangelelwe ukuthi iqhutshwe okwamaviki amane njalo yiyo ezaphetha isizini.
