admin
YiNtatheli kaMthunywa
KULEPHOLISA leBinga elisele lithoba amanxeba ngemva kokuba lingqathulwe indebe yomlomo yisibotshwa kubangwa imbanje.
Isiga lesi senzakale mhlaka 16 Mabasa ngesikhathi ipholisa leli njalo elingumamangala uConstable Emmanuel Matutu lisesigabeni seTinde, eBinga.
Umtshutshisi wecala leli, uMnumzana Bruce Maphosa ubikele inkundla yeBinga emavikini adluleyo ukuba umsolwa uNqobizitha Dube oleminyaka yokuzalwa engu-27 waluma umamangala indebe yomlomo yangaphansi ngoba esala ukubotshwa.
Kubikwa umamangala wathola udletshana lokuthi umsolwa wayethengisa imbanje emzini wakhe kungakho wasesiya endlini kamsolwa lapho afika wazenza umuntu ofuna ukuthenga lezo mbanje.
Kuzwakale ukuba umsolwa wakhipha ibhola lembanje elilodwa wanikeza umamangala engazi ukuba wayesezokhele amalahle ekhanda.
Umamangala wazama ukubopha umsolwa kodwa kwehlula nanko phela kubikwa umsolwa watshaya umamangala ebusweni ngesibhakela qede wamuthi nka ngenkalakatha zengavula zamazinyo emlonyeni.
Kuzwakale ukuba umsolwa wazama ukuphunyuka kodwa kwehlula nanko phela umamangala wayembambe okuzwayo.
Amanye amapholisa ayeseduze kubikwa aphanga ancedisa omunye wabo ukuze abophe lesi isigelekeqe.
Ebuzwa ngumantshi uMnumzana Stephen Ndlovu umsolwa ulivumile icala lakhe lokutshaya ipholisa. Ngemva kokuzwa ubufakazi lobu umantshi ugwebe umsolwa ukuyapika entolongweni okweminyaka emithathu.
Online Reporter