admin
Ethel Ncube
ZIKHATHAZEKILE izakhamizi zeHabane, eSigodini ngamachibi lapho okuma khona amanzi engcekeza ngoba zithi ayingozi ebantwaneni kanye lasezifuyweni ngoba kawabiyelwanga.
Izakhamizi ezikhulume loMthunywa ziveze ukuthi ziyesabela ukuthi kungaba lengozi zokugalula kwabantwana kanye lokufelwa yizifuyo zabo ngenxa yemikhuhlane efana lowama-tape worms.
Esinye isakhamuzi esilandisele uMthunywa ngendaba le siveze ukuthi amachibi amanzi engcekeza la ayingozi, phezulu kwalokho abantu bayahamba besiyaphosela ingcekeza phakathi.
“Okudanisayo yikuthi indawo le yayibiyiwe kodwa abantu batshontsha ucingo oluyilo olwaluvikela izifuyo zethu kanye labantwabethu. Khathesi sesihlezi siphethe izibindi ngezandla ngoba phela kawungeke uhlale weluse izifuyo kunye labantwana.
“Ikhansili kayizame indlela yokuthi indawo le ibiywe futhi ukuze kuvikelwe ingozi,” kuchaza uMnumzana Shawn Sithole.
Esinye njalo isakhamuzi uNkosazana Janet Sibanda uthe izifuyo zabo zihlala njalonje zihlaselwa yimikhuhlane ngenxa yokunatha amanzi la alengcekeza.
“Imikhuhlane enjengowamatape worms ihlala njalonje ihlasela izifuyo zethu lapha ngoba zinatha amanzi alengcekeza.
“Sicela ikhansili yeMzingwane izame icebo lokuthi indawo le ivikelwe kusesemasinyane ngoba phela thina vele siphila ngokufuya inkomo, emasimini kasitholi lutho,” kutsho uNkszn Sibanda.
Iphephandaba likazulu libuye lakhulumisana loChief Executive Officer weMzingwane Rural District Council uNdumiso Mpofu yena oveze ukuthi ucingo solwatshontshwa kabili.
“Ucingo lwalukhona kodwa lwatshontshwa safaka olunye lwatshotshwa njalo, okwakhathesi sikhangelele ukufaka olunye ukuze sivikele izifuyo ukuthi zingangeni labantwana njalo bangafinyeleli engcekezeni le,” kutsho uMnu Mpofu.
UMnu Mpofu uveze ukuthi amachibi la agcina amanzi angcolileyo okweminyaka emibili abesekhitshwa kufakwe amanye.
“Sekuke kwaba lenkomo eziwela emachibini la ikakhulu ngesikhathi sendlala ngoba lapha kuyabe kulotshani obuluhlaza zilanda utshani obuluhlaza lapho kodwa akukaze kube lefela phakathi.”
Online Reporter