admin
YiNtatheli kaMthunywa
ZILOKHU zididekile izakhamizi zesigabeni seDombolidenje esigabeni seBeitbridge ngemva kokubulawa kwenye indoda emakhasini kubangwa ukuba kudlalwe amakhasi ngoba omunye esehamba lemali ngoba ebadlile , uMthunywa ukuzwile lokhu.
UJabulani Maphosa obeleminyaka yokuzalwa engu-29 ugwazwe wafa nguClever Muleya oleminyaka engu-39 ngemva kokuba lengxabano kuviki ephelileyo besemakhasini.
UMthunywa uzwe ukuthi umuyi wathi ebona ukuthi usedliwe emakhasini, wasesithi ngcono kudlalwe njalo ngoba esebathathele imali kwahle kwaqala ukungazwisisani.
Kubikwa umetheswacala wayesebadlile ngakho umuyi wasesisithi kangahambi badlale njalo ngoba esethethe imali zabo kanti kabuzanga elangeni kwahle kwaqala umsindo.
Ekhuluma lentatheli kaMthunywa uMnumzana Litshewo Tlou uveze ukuthi lokhe ethithibele ngoba babesemdlalweni bezikholisela kodwa umdlalo wacina usulesidumbu phansi.
“Bekuphithizela kodwa kungekho okubi, abanye benatha njalo abanye babezidlalela amakhasi.
“Emakhasini yikho okuvele khona ukungazwisisani kuhle sekubangwa ukuba kudlalwe njalo ngoba esedliwe imali yakhe enengi. UClement wala wathi kasafuni kwahle kwaqala umsindo,” kulandisa uMnu Tlou.
Omele isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uvumile wathi solufikile ewofisini yabo.
“Udaba lwamadoda amabili abelokungazwisisani ngemva kokuba uJabulani osengumuyi ethe umsolwa kadlale engayekeli ngoba esebadle imali zabo yikho ukucina emhlaba ngengqamu esifubeni solufikile ewofisini lethu.
“Uzulu kaxekane lokuhamba ethwele izikhali ngoba kubangela ukulahlekelwa yimpilo mahlayana nje.
“Abangabe belolwazi lokuba uClement Muleya ungaphi sicela bazise amapholisa aseduzane loba ukutshaya ucingo,” kuphetha uInsp Mangena.
Online Reporter