Online Reporter
Ethel Ncube
KWEHLE iyezi elimnyama kwenye imuli yeKwekwe ngemva kokuba kutshaywe umuntu kubangwa igolide wedlula emhlabeni ngeviki ephelileyo.
Isehlakalo lesi senzakale eBully Mine eKwekwe.
Umufi uLennon Obert Manguza obeleminyaka engu-46 yokuzalwa, weMsasa, eKwekwe obengesinye isisebenzi emgodini lo, kubikwa utholakale efile endlini yakhe yokulala ngemva kokubhaxabulwa esolwa ngokutshontsha igolide elilinganiselwa ku-2,6 grammes.
Abetheswacala abathi uObedience Maponga, Emmanuel Kazika loAustin Maisva bancedisa amapholisa ekuchwayisisweni kwecala leli elenzakala mhlaka 7 Mbimbitho.
Kubikwa abetheswacala abathi uMaponga kunye loKazika ngonogada emgodini lo kuthi umetheswacala wesithathu uMaisva ngumnikazi womgodi.
Kubikwa ukuthi ngehola lesithupha ntambama onogada ababesemsebenzini ngesikhathi kutholakala ukuthi 2,6 grammes yegolide elalitholakale alisabonakali bahle basola umufi ngokulintshontsha.
Onogada laba bamthatha bamusa ehofisini yabo, lapho abetheswacala abathathu abatshintshana khona ukumtshaya umzimba wonke besebenzisa inswazi.
Ngemva kwalokho kuthiwa bamusa endlini yakhe yokulala (cabin).
Esinye isisebenzi semgodini lo safica uManguza elele phansi esefile ngehola letshumi lanye ebusuku (2300hrs), sahle sayabikela amapholisa enkambeni yeKwekwe Rural.
Intatheli ixhumane lesikhulumi samapholisa eMidlands uInspector Emmanuel Mahoko obike ukuba indaba enjalo isezandleni zamapholisa.
“Amapholisa akhuthaza uzulu ukuthi bangathathi umthetho bawufake ezandleni zabo ngokutshaya ometheswacala ngoba nxa besenzanjalo bayabe bedala amacala.
“Umthetho uthi bonke abonayo kumele bahanjiswe emapholiseni ukuze amacala abo aphathwe ngendlela esemthethweni,” kutsho uInsp Mahoko.
