adminMsilisi DubeCornelius Luphahla
KULELOJA lelokitshini leNkulumane eselithethe bonke abafazi belokitshini leli labenza abalo nanko phela kubikwa liya labo emacansini lisebenzisa umbobobo.
Kuzwakale ukuthi amadoda elokitshini leli azonde agane unwabu ngenxa yendoda le eyaziwa ngokuthi nguNdlovu ngoba ilala lamanina la iloba yisiphi isikhathi efuna ngaso.
Elinye inina eliveze ukuthi lahlukuluzwa yindoda le ngomuthi wayo lo elithande ukwaziwa ngokuthi nguNkosikazi Ncube nje kuphela lithe indoda le kumele ixotshwe elokitshini leli ngoba lokhu ekwenzayo kuyikuganga okuphindiweyo.
“Mina ngangivela emavinkilini ngehola letshumi ekuseni. Ngadlula eduze lendlu yomdala lo owayemile esangweni. Wathi engibona waqala ukutshayelela unyawo lwakhe phansi. Khonokho nje ngazizwa engani sengisemacansini lowesilisa.
“Abangibonayo bathi ngama okwesikhathi eside ngisenza njengomuntu osemacansini. Umdala lo wayengikhangele ebusweni kodwa isimanga yikuthi wathi engena endlini lami ngaqalisa ukuhamba. Sengifike endlini ngabona ngigcwele ubudoda emlenzeni okuyikho okutsho ukuba ngangisemacansini,” kulandisa uNkkz Ncube.
UNkkz Ncube uqhubekele phambili wathi ucabangela ukuba indoda le isebenzisa imithi ngoba iyabe ihlikihlela unyawo engani iyagida yona isenzela ukuganga.
“Sengisesaba ukuquma phambi kwendlu yakhe ngoba sengizwe amanina amanengi esithi ayahlukunyezwa kwezocansi. Kukhanya ungadlula phambi kwendlu yakhe engakuhawukela uyakuhlukuluza emacansini,” kuchasisa uNkkz Ncube.
Esinye njalo isakhamuzi uMnumzana Emmanuel Moyo uthe udaba lwendoda yombobobo soluludaba olusegudwini njalo lamanina asesesaba ukuhamba emini.
“Amanina amanengi akhala ngokuhlukunyezwa emacansini ngesinye isakhamuzi esihlala kuleli lokitshi.
Njengabobaba sike saphuma ijumo sayamdinga lapho ahlala khona kodwa kaziwa ukuba wayangaphi ngoba abantu basebefuna ukumtshaya.
“Lubaba uvele kaziwa elokitshini ngakho lathi sambona esehlala khonapha. Kuthiwa engakuhawukela uyalala lawe. Mhlawumbe lowami umfazi useke wagangelwa yisigangi lesi engazi,” kuveza uMnu Moyo.
Ukhansila wakulelilokitshi uMnumzana Gedion Mangena uthe ulutholile udaba lolu kodwa kunzima ukuba aluthonisise kuhle ngoba kungelabufakazi obubambekayo.
“Indaba yendoda yombobobo ngiyizwile kodwa uhlupho yikuthi asilabufakazi obubambekayo. Ngabe lowomuntu samthola esenza ukuganga lokhu ngabe kuyezwakala. Manje uhlupho sizwa ngamahungahunga.
“Umuntu ocatshangelwayo okwakhathesi kakho, kuthiwa wabonakala ethwele isikhwama ehamba. Okunye njalo yikuthi ukucabangela umuntu kuyingozi ngakho kuyabe kufuna kulobufakazi obubambekeyo,” kuphetha uMnu Mangena.
Online Reporter