adminFairness Moyana
KULENINA leBinga ebelimiswe phambi komthethwandaba lisetheswa icala lokutshisa umntanalo izandla ngomlilo andubana lithi lalimlaya.
UEstele Muzamba (56) ohlala esigabeni seLubanda khonale eBinga ngaphansi kwenduna uSaba utshiye umthethwandaba ungelenkani ngemva kokubikela umantshi uPortia Mhlanga ukuthi okwenza watshisa umntanakhe ngomlilo yikuthi wayemlaya ngoba kalamthetho.
“Nkosi, umntanami kahloniphi ngakho ngangizama ukumfundisa umthetho ngoba ngiyamthanda njengoba elicinathunjana lami. Ngangithi ngimqondisa indlela ngakho ngicela umthethwandaba ungixolele,” kulandisa umsolwa.
Njengomama obeyisibonelo esibi emphakathini, umantshi uNkkz Mhlanga umgwebe inyanga ezintathu, andubana athi uzasebenza amahola angu-105 esikolo seLubanda.
Inkundla izwe ukuthi umsolwa owayengajabuliswa yizenzo zabantwabakhe abathathu abangamankazana, wabona kufanele ukuthi ajezise umntanakhe lo ngalindlela.
Umtshutshisi uMnumzana Tinomupeyi Mbiza ubikele inkundla ukuthi mhlaka 19 Lwezi nyakenye, umsolwa wabizela umntanakhe emkulwini, ngemva kwalokho wathi kaqondise izandla zakhe. Waqhubeka wambamba izandla wazifaka emlilweni.
Kubikwa umamangala wazama ukulwisa ukuthi aphunyuke kodwa wehluleka.
Kuzwakale ukuthi umamangala walimala kakhulu izandla wasuka lapho wayabikela ugogo wakhe onguye owabikela ikhomithi ekhangela ngezokuvikelwa kwabantwana, ngakho uMuzamba wabotshwa.
Kubikwa kumnyaka ophelileyo kulomunye njalo umama obeleminyaka engu-28 owatshisa umntanakhe oleminyaka emithathu izandla ngepani ngoba edle amazambane akhe engamphanga.
Online Reporter