admin
Msilisi Dube
KULOWESIFAZANE odabuka eJotsholo, eLupane okubikwa umiswe phambi komthethwandaba weLupane emavikini adluleyo esetheswa icala lokugongoda waze wabulala uyise ngoba engafuni ukukhuzwa.
Umtshutshisi wecala leli uMnumzana Wilbert Ngoshi ubikele inkundla yeLupane ukuthi umsolwa, uLyphine Nkomo oleminyaka engu-20 yokuzalwa waxabana loyise osengumuyi uKenneth Nkomo ngomnyaka ophelileyo wacina esemgongoda okwabangela ukufa kwakhe.
Kubikwa mhlaka 14 Mpandula ngomnyaka ophelileyo, umuyi waxabana lendodakazi yakhe engumsolwa emethesa icala lokungamhloniphi nanko phela wayengasakhuzeki.
Kubikwa ngalesosikhathi umuyi wadobha ugodo olungaba yimitha eyodwa wazama ukubhula ngalo umsolwa kanti kabuzanga elangeni nanko phela bacina sebesilwa okwacina kubangela ukuba umuyi akhulelwe.
Kuzwakale ukuthi umuyi wacina esewela phansi ngesiphundu umsolwa wasemhluthunela ugodo ayeluphethe wamgongoda ngalo kabili ekhanda okwabangela ukuthi umuyi aqaleke.
Kubikwa umamangala wabaleka ngakibo wayahlala koyisekazi ngoba ebona uyise eseqalekile. Udaba lokufa kukamuyi lwamangalwa enkambeni yeJotsholo.
Umsolwa ubanjwe kuwonalo umnyaka ngakho wathonisiswa ngecala lakhe. Umantshi kazange abuze umsolwa ukuba uyalilandula kumbe uyalivuma icala lakhe.
Ugodo alusebenzisayo lusetshenziswe njengobufakazi emthethwandaba njalo kubikwa lokhe lulegazi. Umsolwa ubemiswe phambi kukamantshi uNkosazana Aeline Munamati.
Icala leli lidluliselwe phambili kumhlaka -30 kuyonale inyanga njalo umsolwa kumele abonakale enkambeni yamapholisa eJotsholo maviki wonke ukuze kubonakale ukuthi ukhona njengoba ezithwele.
Online Reporter