Online Reporter
Sikhumbuzo Moyo
KUBE lusizi edolobheni leHwange kulandela ukwedlula emhlabeni kukamqondisi wenhlelo zezindlu lemisebenzi yomphakathi eHwange Local Board, uMnumzana Ananias Banda.
Umuyi ubeleminyaka engu-53 yokuzalwa. Ubengumphathi olodumo lenhlonipho kulelidolobho. Wedlule emhlabeni ngeSonto ntambama, emzini wakhe njalo utshiye umkakhe labantwana abathathu.
Isikhulumi seHwange Local Board uMnumzana Dumisani Nsingo uthe balusizi ngokuzwa ngokufa kukaBanda.
“Sibika ngokudabuka okukhulu ngokwedlula emhlabeni kukaMnumzana Ananias Banda, obengumqondisi wezindlu lenhlelo zikazulu ekhansilini yethu.
“Wedlule emhlabeni ngeSonto ntambama, ngemva kokugula isikhathi eside.”
UMnu Nsingo uchaze uBanda njengomuntu obezimisele ukusebenzela umphakathi ngokuzimisela.
“Umuyi uqale ukusebenzela ikhansili ngo2018. Usebenze ngokuzimisela, watshengisa ukuthi ulothando lokusebenzela umphakathi,” kutsho uNsingo.
Uthe kuzabikwa ngelanga lokungcwatshwa.
