Online Reporter
Lovemore Dube
INTATHELI zomdlalo kanobhutshuzwayo kuleli, okaputeni labaqeqetshi bamaqembu ePremier League bakhangelelwe ukuthi mhlaka 25 Lwezi bakhethe abadlali abalitshumi lane abadlale kuhle ngo2025.
Ngumncintiswano ophathiswa ngabeDelta Beverages njalo usubekhona kusukela ngomnyaka ka-1969.
Umcimbi wokupha izicoco abathathu okubikwa bedlale ngcono kulomphakathi wonke, yiwo ogqiba umnyaka kubhola leCastle Lager Premiership.
Umcimbi lo uzakuba khona mhlaka 5 Mpalakazi.
Njengenjwayelo, abalandeli bomdlalo bayaphikisana nje ngokuthi lonyaka ngobani abazakhethwa.
Imizi eminengi iyakuthanda ukuwagcina amakhalenda abadlali abazingcitshi kuze bagcine isiqephu sembali yomdlalo wethu.
UWashington Navaya, Emmanuel Jalai, Andrew Mbeba, William Thole loKevin Moyo yibo abadlali abenze okukhwabithekayo kumnyaka ka2025.
UNavaya nguye osehlohle amagoli edlula abadlali bonke abeCastle Lager Premier Soccer League. Uhlohle amabhola angu-17. Udlalela iTelOne yase Gweru.
Lugodogodo olude oluqinileyo, oluthuzayo njalo luqedisa ngendlela enhle phambili.
UEmmanuel Jalai udlale ngendlela emnandi njalo kungabaliphutha nxa engaswelakala kukhalenda ngoba uzalazo. Uyavimba njalo nxa esiyaphambili udlala mnandi osekwenze labangalandeli iDynamos bamthande. Udlalela njalo leqembu lamaWarriors.
OkaMoyo, yena uyise uBishop owadlalela iBulawayo Wanderers, ubengomunye obephethe iScottland kuhambo lwayo lokuyathatha inkezo yeCastle Lager.
Udlale phose imidlalo yonke ekhokhela esemuva njalo etshengisa ukuthi useleminyaka ekwezemidlalo.
UMoyo wavela kuBantu Rovers leFC Platinum.
Kungaba liphutha elikhulu nxa angehluleka ukuba kwabathathu abaphezulu. UMbeba oweHighlanders ume ngekhanda watshengisela ubukhokheli ngendlela ami ngayo. Udlale kuhle njalo engaba nguye yedwa owakoBulawayo ongakhangelwa.
UThole obambela iSimba Bhora laye ubelomnyaka omuhle. Ulemidlalo efika16 engazange ahlohlwa kuyo.
Kubonompembe kukhanya uBrighton Chimhene angaphinda athathe isicoco leso.
