admin
YiNtatheli kaMthunywa
ABALANDELI beqembu lenguqu iHighlanders basola inkokheli zaleliqembu ngokuthi kazikhiphi mali yokudinga abadlali abangatshintsha ukudlala kwalithimu.
Loba iBosso indiza phezulu kungalane yePSL okwamanje, abasekeli bayo abakhulume loMthunywa bayesaba ukuthi ithimu le ingaphanga iyehlike emqongweni ngenxa yokuxega kwayo.
Isikhalazo sivela ekuthini iqembu leli alilabadlali ababukhali kubagadli bayo, kukanti isililo esikhulu siphuma ngabadlali abatshibilika esiswini.
IHighlanders iqede umdlalo wayo leChicken Inn isehluleka ukuthi ifikise ibhola ngale kwengxenye yenkundla.
Umdlalo lo uphele iChicken Inn inqobe 2-0. Kulokwesaba okukhulu ukuthi iHighlanders ingekela ukulungisisa udaba lwabadlali laba, kungenzeka iqede isizini ihlikihla izandla ngokwehluleka.
Inengi labasekeli bayo likholwa ukuthi kumele umqeqetshi uErol Akbay angene emakethe.
IHighlanders ilomkhuba onanzelelwe ngabalandeli ukuthi iyathenga abadlali engasoze ibasebenzise. Okusemlonyeni yabanengi yikugxanguza kwenkokheli zeHighlanders ezibiza inqwaba yabadlali abangasoze bayisize ngalutho.
Bakhona njalo abadlali asebephenduke inhlekisa enkundleni ababalisa uSimon “Yola” Munawa, uDouglas Sibanda loCrispen Kasimero.
UPatrick Ncube, olilunga leBosso ngokuphelelelyo, utshele uMthunywa ukuthi ithimu le kumele iyekele ukugodla imali nxa izimisele ngokubuyisa udumo lwayo lokuba yingqwele yePSL.
“Ngemva kokuthi iBosso isiqede iminyaka elitshumi isehluleka ukuthwala isicoco seligi, ngalibeka ilizwi lokuthi nxa inkokheli zethu zingafuni ukuthenga abagadli, angeke siphinde ukuba zintshantshu.
“Kulabadlali abadala abafana loMunawa, njalo futhi sebedlale isikhathi eside eqenjini. Umqeqetshi wethu uAkbay kumele athengelwe abadlali bezinga eliphezulu njalo abaqaphele ukuhlohla.”
Omunye umlandeli kaMantengwane uGillian Gumede uthe: “Kanti nxa ikomithi yethu isithi umqeqetshi avume ukungathengi abadlali bathini. Siyavuma ukuthi iqembu alilamali kodwa ngeke sehlulwa yikuthenga abagadli ababili kumbe abathathu.
“Kwamanye amazwe amaqembu amakhulu atshengisela ubukhulu bawo ngokusayina abadlali.Banengi abadlali ababukhali abafuna ukuza kuBosso. Akukhitshwe loba yimalini ukuthola umdlali ozahlohla njengoZenzo Moyo, adlale njengoHonour Gombami, kutsho uGumede.
“Lapha ngikhuluma ngamaqembu afana leBarcelona leReal Madrid (aseSpain). IBarca leMadrid abalandaba lokuthenga abadlali abenza kuhle kwamanye amaqembu. Nxa kulomdlali owenze kahle eqenjini elincane kuDivision One, kumele abizwe kuHighlanders.”
UBukhosi Nkiwane laye osekela iBosso ukhulume ngelibuhlungu mhla kuphela umdlalo obudibanise iHighlanders leChicken Inn.
“Okunye engikubona kubulala iBosso yikulanda abadlali bangaphandle, siphinde singabadlalisi abadlali laba. Ngokwami, umdlali ovela kwenye ithimu kumele akhuhle ibhentshi,” nguNkiwane lo.
Ekhuluma loMthunywa, umqeqetshi uAkbay uthe kasoze azihluphe ngokudinga abadlali kodwa uzakhetha ukuphakamisa abasakhulayo abadlala kuqembu elincane.
“Angisiboni isizatho sokuthi sisabalale sidinga abadlali. Bakhona abakuma-juniors. Sizasebenza labo,” kutsho lumqeqetshi ngesikhathi eqeda kulolonga ithimu ngoLwesibili emini.
Online Reporter