YiNtatheli kaMthunywa
KULEZIMULI ezedlula i-17 000 kunye lamabhizimusi edolobheni leMasvingo lezindawo eziseduze ezilahlekelwe yimpahla ezibiza izigidi zamadola ngoMvulo ebusuku ngemva kokuna kwezulu lesiqhotho okudale umonakalo omkhulu.
Kubikwa izindlu ezedlula i-8 500 zisele zingela phahla njalo uMongameli welizwe uMnangagwa usethe isimo lesi siyinhlekelele.
Izakhamizi zithe isiphepho lesiqhotho sangoMvulo sibe sibi kulazo zonke asebeke bazibona lokhu bathwetshulwa yingwe njengoba sithinte imuli eyodwa phakathi kwezintathu edolobheni.
Isiphepho lesi siphinde sabangela umonakalo omkhulu ezakhiweni zikaHulumende ezibalulekileyo, okugoqela izikolo, izibhedlela lezinye izakhiwo zikaHulumende.
Kusitatimende esikhutshwe ngoLwesibili ebusuku, uMphathintambo wogatsha olubona ngemisebenzi kaHulumende ezindaweni ezehlukeneyo kanye lemisebenzi yokwakha uDaniel Garwe uthe isimemezelo senziwe kulandela uSection 27(1) weCivil Protection Act (Chapter 10:06).
“Ngemva kwesiphepho esesabekayo lesiqhotho esihlasele isabelo seMasvingo ngoMvulo, mhlaka 5 Mfumfu 2026, uMongameli uKhomuredi Dokotela Mnangagwa, usethe indawo ezithintwe yisiphepho lesi yinhlekelele.
“Isimo sezulu esibi kakhulu sibangele umonakalo omkhulu ezindlini, ezakhiweni zikahulumende ezibalulekileyo, ezikolo lasezibhedlela kanye lasezindaweni zamabhizimusi. Lokhu sokudinga ukuthi kuthathwe amanyathelo masinyane ukuze kuvikelwe impilo zabantu njalo kuncediswe ekulungiseni umonakalo,” kutsho uMphathintambo uGarwe.
Isiphepho siphinde sabangela ukucitshwa kwamagetsi ngemva kokuba intambo ziwele phansi endaweni ezehlukeneyo njalo kwaphambaniseka lama-transformer.
Ukusilela kwamagetsi sekuphinde kwaphazamisa inhlelo zokumpontshwa kwamanzi kakhansili aya ezindlini.
Imuli ezinengi zisele egcekeni njalo zibhekane lobunzima ngemva kokuphahlazeka kwamafasitela, ukuwa kwemiduli kanye lokuthathwa kwempahla zezindlu, okubangele ukuthi amanzi ezulu angene phakathi ezindlini.
Amabhizimusi edolobheni leMasvingo lawo aphazamiseke kakhulu njengoba izitolo ezinkulu kanye lezindawo zokulala lezokwamukela izivakatshi ziwelwe ngumonakalo omkhulu lazo.
Lokhu kubangele ukuvuza kwamanzi kakhulu kanye lokonakala kwempahla.
Uhulumende uthe lokhu sekubeka impilo kazulu engozini njalo usebenza ngokuphangisa ukulawula lesi simo.
Izikolo ezisedolobheni lazo kazisindanga kulomonakalo. NgoLwesithathu abafundi babe balutshwana ezikolo, inengi labo belisemakhaya lisesabela impilo zalo ngenxa yokuhlukumezeka kwengqondo okubangelwe yisiga esenzakale ngoMvulo ebusuku.
Ngokutsho kweCivil Protection Unit (CPU), abafundi bezikolo zamabanga aphansi yibo abathinteke kakhulu.
Uhulumende, esebenzisa i-CPU leJoint Operations Command (JOC), ngoLwesibili iqalise ukuvulela umphakathi indawo zokuhlala zesikhatshana e-DDF Masvingo lodges laseMaud Muzenda Training Centre ukuze kuhlaliswe abantu abasele bengelamakhaya. Kuvulwe njalo indawo yokuhlola lokunakekela abalimeleyo eMucheke Hall.
I-CPU eMasvingo iqhubeka ngemizamo yokwehlisa ubunzima obubhekane lezakhamizi ezithintekileyo.
Isikhulumi sesabelweni uMnumzana Rodgers Irimayi uthe basebenza lenhlanganiso ezithile ukuncedisa izimuli ezithintekileyo.
“Sekulemizi engaba ngu-13 500 eMucheke, Rujeko laseVictoria Ranch ethintekileyo ngenxa yokonakala kwamafasitela, imiduli kanye lophahla lwezindlu,” kutsho yena.
“Ukuhlola kwethu kokuqala kutshengisa ukuthi kulabantu abangu-67 500 abathintekileyo edolobheni leMasvingo, kodwa ngenhlanhla kasizange sithole umbiko wokufa.”
UMnu Irimayi uthe inani labantu abalimeleyo alikatholakali.
“Sesithole imbiko engaqinisekiswanga yokuthi kulabanye abantu abalimeleyo ngenxa yamafasitela abhidliziweyo kanye lophahla olwaluphakama ngenxa yomoya, kodwa kasikatholi inani eliqondileyo labalimeleyo.”
