Sikhumbuzo Moyo eseMzingwane
UKUBEKWA kukaNkosazana uNomalanga Sigola esikhundleni sokuba yinduna sekulethe ithemba, ukuziqhenya kunye lesizotha ebantwini beSiphezini esigabeni seMzingwane, eMatabeleland South, akade sebeleminyaka phose emithathu bengela mkhokheli womdabu ogcotshiweyo.
UNkszn Sigola, oleminyaka engu-47, ubekwe ngokusemthethweni ngoLwesithathu emkhosini obusesikolo seSigola Primary, lapho athethe ubukhokheli besigaba sakoSigola kuyise ongasekho, iNduna uZephania Sigola, owatshona mhlaka 1 Nkwenkwezi ngomnyaka ka2023.
UMphathintambo wogatsha olubona ngemisebenzi kaHulumende ezindaweni ezehlukeneyo uDaniel Garwe obemelwe nguMqondisi obona ngokwenzakala ewofisini kaMphathintambo obona ngokwenzakala esabelweni seMatabeleland South, uNkosikazi Sikhangele Ndlovu, uthe ukubekwa kweNduna uSigola kuyisenzo esiqakathekileyo emphakathini njalo kutshengisa indima eqakathekileyo edlalwa ngabesifazane kubukhokheli.
UMphathintambo uGarwe uthe ukubekwa kweNduna uSigola kuveza ukuzinikela kwelizwe ekukhuthazeni ukulingana, kanye lokunika abesifazane amathuba alinganayo okuba yingxenye yobukhokheli, okugoqela lasezikhundleni zobukhokheli bomdabu.
“Ukunqoba lokhu akusikunqoba kweNduna kuphela; yikunqoba kwabantu beSiphezini, kwabesifazane bonke kanye lamantombazane wonke aphupha ngokuba ngabakhokheli lokuba lekusasa elingcono.
“Sikhangelele isahluko esitsha lapho iNduna ezasebenza khona ndawonye labantu bayo, labanye abakhokheli bomdabu, uHulumende kanye labo bonke abathintekayo, ukukhuthaza ukuthula, ukubambana, ukulondolozwa kwamasiko kanye lokuthuthukiswa kwendawo le,” kutsho uMphathintambo uGarwe.
Esethula amazwi okwamukela abantu, uMphathintambo obona ngokwenzakala esabelweni seMatabeleland South u-Albert Nguluvhe obemelwe yinduna uTshitaudze oweBeitbridge, uthe umkhosi lo uphawula ihlandla eliqakathekileyo emulini yakoSigola lakuzakhamizi zakulindawo.
“Lokhu kuphawula ukuqala kwesahluko esitsha kumbali yobukhokheli besigaba sikaSigola, lapho okweminyaka engaba mithathu abantu bebengelayo induna egcotshiweyo,” kutsho uNguluvhe.
Uthe ukugcotshwa kwenduna uSigola kuzaletha ukuziqhenya emphakathini, kuphinde kuqinisekise ukuthi izakhiwo zobukhokheli bomdabu ziyaqhubeka zifeza indima yazo ekuthuthukiseni indawo lokubambana.
Imuli yakoSigola ibonge uMongameli u-Emmerson Mnangagwa ngokuncedisa ukuthi kubekwe iNduna Sigola ngemva kweminyaka emithathu kwakhothama uyise, iNduna uZephania Sigola.
Ekhuluma emele imuli yakoSigola, uBongani Sigola, ongumnewabo wenduna, uthe umdeni uyathokoza kakhulu ngokuthi umkhosi obukade ulindelwe isikhathi eside ekucineni usuze wenzakala.
“Sithanda ukubonga uMongameli Mnangagwa ngokuvumela umcimbi wokuthi udadewethu uNomalanga abekwe abe yiNduna uSigola egcotshiweyo. Sizizwa sihloniphekile,” kutsho uMnu Sigola.
INduna uNomalanga Sigola usengowesifazane wesitshiyagalombili eZimbabwe ukubekwa esikhundleni sobukhokheli bomdabu.
Ababekwa ngaphambi kwakhe yiNduna uSinqobile Mabhena weMzingwane, iNduna uKetso Mathe weGwanda, iNduna uHikwa weBulilima, iNduna uMvuthu uSilibaziso Mlotshwa weHwange, obambele iNduna uMabhikwa uZanele Khumalo weLupane, kunye leNduna uChimukoko wesabelweni seMashonaland East kanye lenduna uNdube uNonhlanhla Sibanda osewadlula emhlabeni weNsiza.
Kumkhosi lo bekulezinduna ezitshiyeneyo, ezigoqela iNduna uMabhena, iNduna uGwebu leNduna uMathe.
