admin
Mthokozisi Dube
UMHLABELELI oyisizalwane seZimbabwe ohlala eAustralia, uFortune Ruzvidzo usekhuphe ingoma evutha amalangabi uSalvation, Glory and Power (Insindiso, Inkazimulo, Lamandla).
URuzvidzo uthe ingoma le eyenzwe ngobunono obukhulu uthethe amazwi ayo uyithethe eBhayibhilini kuSambulo 19 vesi 1 othi “Dumisani uThixo, insindiso, inkazimulo, lamandla ngokukaNkulunkulu wethu”.
“Ngangibala ibhuku likaSambulo eBhayibhilini lami ngezwa kusithi ngihlabele amazwi lawa. Kuyangithokozisa kakhulu ukuthi abantu bayayithakazelela ingoma le,” kutsho uRuzvidzo.
Uthe kuyamthokozisa ukuthi ethi esangumhlabeleli ocathulayo abalandeli bomculo wezenkolo bathakazelele umsebenzi wakhe.
“Kuyangijabulisa kakhulu ukuzwa abantu bebusiseka ngomculo wami.
Okungijabulisa kakhulu yikuthi labobantu bathi ibasondeza duzane loMdali wethu nxa beyilalele ingoma yami.
UThixo uyamangalisa futhi muhle kakhulu,” kulandisa uRuzvidzo.
Uveze ukuthi amaCD akhe ahle athengwa aphela iviki ingakapheli eAustralia. Uthe abafisa ukuthenga ingoma yakhe bangayifinyelela ku-intanethi (internet).
Uveze ukuthi okwenza ingoma yakhe ibe lomsoco yena esaqala ukuhlabela lusizo lukaMoya Ongcwele. Uphinde wagcizelela ukuthi waqakathekisa ukuthatha isikhathi sakhe ekuhlabeleleni lingoma walungisisa lapho okwakungabalamaphutha khona.
“Ingoma le ivela kuMoya Ongcwele, yikho okwenza ibelomsoco kakhulu.”
URuzvidzo uthe isifiso sakhe yikuthi athathe umculo odumisa uThixo awuse ezizweni.
Uthi yena kafuni ukuthi nxa abantu belalele umculo wakhe bajabule kuphela kodwa ufisa babone ubungcwele lobubanzi bukaThixo.
Umhlabeleli lo oleminyaka engamatshumi amabili lambili yokuzalwa uthi waqala ukuhlabela ekugwalo lwesine kumfundo yaphansi eRobert Tredgold koBulawayo.
Waqhubeka ehlabela waze wafika kumfundo yaphezulu eAustralia.
Waqhubeka elolonga isiphiwo sakhe sokucula waze wakhethwa ukuthi ahlabelele iqembu leBrisbane City Gospel Choir. Nguye obekhalela kungoma yeBCGC entsha uMelody. IBCGC isike yahlabela kumicimbi eminengi efana lemitshado leminye imihlangano yamakholwa eAustralia.
“Iqembu leBCGC liyisibusiso kimi ngoba ngabantu abalothando njalo abazimiseleyo kwezomculo. Ngifunda okunengi kakhulu kubo,” kutso uRuzvidzo.
Usebhale ingoma ezidlula amatshumi amathathu njalo ufisa ukuthi ezinye zakhona zibe kudlalade lakhe eligcweleyo kumnyaka ozayo.
Uthe yena uzibona ephumelela esiba ebangeni eliphezulu kakhulu kwezomculo kodwa uthembise ukuthi uzaqaphela ukuthi udumo lonke luye kuThixo.
URuzvidzo osafundela ukuba ngumongikazi uthe ukuhlabela ikakhulu ingoma zenkolo kuyaguqula impilo zabantu njalo kuyintshumayelo kulabo abangakamazi uThixo.
Ukhuthaze abanye abahlabela ingoma zesonto ukuthi badinge ukuholwa nguMoya Ongcwele andubana baqale ukukhipha amadlalade.
Online Reporter