adminYiNtatheli kaMthunywa
KULESOTSHA leHwange elake lagwetshelwa ukuba lobudlelwano lentombazana eleminyaka engaphansi kwengu-16 okubikwa ukuthi selithandana lamanye amantombazana amancane ayisificaminwe mibili.
Umsolwa uSheunesu Goreve oleminyaka engu-26 umiswe phambi kukamantshi wesabelweni seMatabeleland uSharon Rosemani esetheswa icala lokuhlangana lentombazana eleminyaka engu-14 emacansini njalo kubikwa ulakho ukwetheswa amanye amacala kulandela ukuba abafakazi beveze ukuthi umsolwa ulomkhuba wokuhlangana lamantombazana amancane emacansini.
Kusenjalo abafakazi laba baveze ukuthi bayesaba ukwala ukuhlangana lomsolwa emacansini ngoba elisotsha.
Umantshi ugwebe umsolwa umnyaka owodwa esejele kodwa wephula inyanga eziyisificamunwe munye kukhangelelwe ukuthi asebenze kungelambadalo esikolo seNechibondo Primary.
Inkundla izwe ukuthi phakathi kwenyanga kaNhlangula nyakenye uGoreve wakhombisa untombazana lo wavuma.
Kubikwa mhlaka 10 ngenyanga kaZibandlela kuwonalo umnyaka ngehola letshumi ebusuku umamangala wayavakatshela uGovere endlini yakhe eMpumalanga lapho abaquma ukuyavakatshela umnewabo koBulawayo.
Kubikwa ngalelolanga uGovere wahlangana lomamangala emacansini njalo wayesehlala ehlangana laye ngoba esembalekisile.
Inkundla izwe njalo ukuthi kuleyonyanga umsolwa wasuka endlini lomamangala esiyavakatshela umngane, ngaleso sikhathi kubikwa udadewabo kamamangala wafika edinga umnawakhe wamswela.
Ngemva kwalokho udadewabo kamamangala wahamba wayabikela amapholisa ngemva kokuzama ukukhulumisana lomsolwa okuyikho okwabangela ukubotshwa kwakhe mhlaka 2 Nhlolanja.
Umtshutshisi kulelicala bekunguMnumzana Tawanda Sigauke.
Online Reporter