admin
Ncekwenhle Ncube
NGAPHANDLE kokuhlanganisa uzulu ngezokuxhumana inkampani yeTelOne isikhethe ukuthi ithathe inyathelo elibanzi lokusondeza uzulu wakoBulawayo ngokugcina idolobho labo lihlanzekile.
Inkampani le ehloniphekayo kwezokuxhumana iTelOne ibonise ukuzimisela ekugcineni idolobho lakoBulawayo lihlanzekile ngoLwesihlanu ngokupha ikhansili yakoBulawayo amabhimu angu-500.
Ekhuluma ngesikhathi sokupha isipho lesi uMqondisi weTelOne uNkosazana Chipo Mutasa uthe inkampani yabo ilomlandu wokugcina indawo abasebenzela kiyo ihlanzekile yikho nje bephathise ngesipho samabhimu okulahlela ingcekeza.
“Thina njengawo wonke amankampani silomlandu wokugcina indawo yethu ihlanzekile. Yikho nje sikhethe ukuthi siphe idolobho lakoBulawayo impahla le eliyibonayo yokulahlela izibi.
“Sikhuthaza ukuhlanzeka edolobheni lakoBulawayo njalo uzulu wonke kumele azizwe elomlandu wokwenza lokhu,” kutsho uNkszn Mutasa.
Akujabulisi ukubona ingcekeza igcwele phansi kodwa kulalapho okulahlelwa khona izibi.
Uqhubekele phambili echaza ukuthi yena lequla lakhe sebeqalisile ukuhamba befaka amabhimu alikhulu edolobheni besebenzisa impahla abalayo kuthi amanye azafakwa emavikini alandelayo.
Inkampani le ibuye njalo yadlala indima eqakathekileyo yokuhlanza idolobho ngokuthanyela lokudobha amaphepha.
Lokhu bakwenze ngenhloso yokubonisa uMthwakazi ukuqakatheka kokugcina indawo yakoBulawayo ihlanzekile.
Umphakathi ubikelwe ukuthi iTelOne izimisele ukuhambisa imbiko kazulu ngesiqubu esimangalisayo lokubona ukuthi bayenelisa ukusebenzisa ubulembu ngezikhathi zonke.
Ikhansili ithethe njalo ithuba leli ukuxwayisa uzulu ukuthi agcine indawo ihlanzekile ngokungalahleli izibi indawana yonke.
Umphakathi ubuye watshelwa ukuthi lowo ozatholakala ebulala kumbe enamathisela amaphepha enkampani yakhe kumabhimu la uzabotshiswa ngoba kulicala ukwenza into efana laleyo.
ITelOne iphethe ngokuthi bazenza noma yini ukusebenzelana loMthwakazi ukugcina ukuhlanzeka kanye lokusebenzelana ndawonye okuzaphathisa ekuthuthukiseni ilizwe leZimbabwe.
Online Reporter