adminYiNtatheli kaMthunywa
KUMINYAKA ezayo akusoke kwethuse ukuthi kube lethimu yesigaba seMatobo edlala inguqu kuligi ephakemeyo kuPSL.
Izakhamizi labosomabhizimusi abaphuma kulindawo kubikwa sebezimisele ukuthi bahlanganise abalakho ukuze babumbe ithimu ezalolongela ukuyancintisa phezulu.
Kubikwa ukuphumelela kweTsholotsho FC yikho okunikeze izakhamizi zeMatobo ingqobe yokuthi balungisele.
UMthunywa uzwe udletshana lokuthi kulomcabango wokuthi kuthengwe ithimu ekuligi kaDivision One ezadlalela eMaphisa kumbe eKezi ukwenzela ukuthi ingene masinyane kuligi ephakemeyo.
Ekhuluma lephephandaba likazulu ngempelaviki edluleyo isikhulumi salabo abatshutshisa inyathelo leli uKholisani uMoyo uveze ukuba kumasizini amabili azayo bazakhipha imali bahlawulele ithimu ezamela isigaba seMatobo kunguqu.
“Inguqu iyabambanisa abantu. Okwenziwa yiTsholotsho kuyasikhuthaza sibili. Siyaphambili ngecebo lethu.
Silombono wokuthi silolonge ithimu esizayincedisa ukuthi idinge abadlali ababukhali kumbe sithenge eyinye ithimu ezabizwa ngokuthi ngeyesigaba sethu.”
Loba uMoyo engasavezanga iqembu abafuna ukulithenga kuPSL lalelo abafuna ukuliphakamisa eMatobo, uthembise uMthunywa ukuba lokho bazakuveza ngomnyaka ozayo.
“Amabizo ngeke ngiwatsho okwamanje ngoba abanye bangasuka baphaphatheke kodwa ngomnyaka ozayo ngizakhipha umbiko.”
Amaqembu alakho ukuthi athuthuke esigabeni seMatobo abalisa i-Barca FC leMongongola Flying Arrows.
Online Reporter