adminMsilisi Dube
INHLANGANISO ebona ngezokulima eyeAgritex isiveze ukuthi abalimi bangazitholela inzuzo enhle nxa bengazinikela ekulimeni isilimo se-beetroot.
Kubikwa abalimi abanengi beMguza bakhomba ngophakathi ngemva kokuthola amajodo e-beetroot amahle okwenze kwaba lula ukuthi bawathengise emkambo.
Omunye umlimi olima epulazini leGreen River eMguza, uMnumana Leonard Nkala uthe ibeetroot le ithengwa ngendlela emangalisayo osekubasize ukuthi bathole inzuzo yokuthuthukisa imisebenzi yabo yokulima kanye lokugcina imuli zabo.
“Abantu basuka endaweni ezinengi zakoBulawayo bezothenga ibeetroot epulazini lethu njalo lokhu kusinika inzuzo enhle.
“Okunye okusijabulisayo ngokulima isilimo lesi yikuthi abantu babuya bodwa bevela koBulawayo bezothenga okwenza thina singabi lendleko zokususa izilimo zethu lapha sizisa emakethe,” kulandisa uMnu Nkala.
Uqhubekele phambili waveza ukuthi ukuthengisela epulazini kuyaphathisa ukuthi isilimo lesi singaboli njengoba besikha okuyabe kwenele umthengi.
Abanye abalimi abavela kulindawo abakhulume lephephandaba likazulu ngesikhathi beseTrade Fair emavikini adluleyo baveze ukuba amajodo e-beetroot ayisilimo esingajwayelekanga ikakhulu ebantwini abansundu kodwa okwakhathesi sekungesinye sezilimo eziletha inzuzo emangalisayo.
“Ekuqaleni besilohlupho lokuthengisa ibeetroot yethu ngoba abantu bakithi bebengayazi kodwa khathesi isilomkambo omkhulu yikho size sangezelela indima yethu,” kutsho uMnumzana Jimmy Ncube.
Ezinye izilimo ezilinywa ngabalimi beMguza zigoqela ikhabitshi, ihanyanisi kunye lemiqwente.
Online Reporter