admin
Yintatheli kaMthunywa
KULENDODA yakoBulawayo esele ifisa ukuthi ngabe umhlaba uyavuleka igqibeleke kulandela ukulandwa yitshamali emsebenzini iyidonse ngebhulugwe ithi ifuna imali yesondlo.
UMthunywa uzibonele ngawakhe amehlo enzikini yedolobho lakoBulawayo, uMaxwell owale ukuveza isibongo sakhe edonswa ngebhulugwe yitshamali yakhe emsebenzini ngoLwesihlanu ngeviki ephelileyo ifuna imali yerenti, amagetsi kanye leyokudla ithi lokhu ikwenza ngoba kasagcwalisi izithembiso zakhe.
Kuzwakale ukuba uMaxwell ubebonakala nsukuzonke letshamali yakhe ngehola lokuqala emini esiyakudla ukudla kwemini okwenza abantu bacina bebona ukuthi kukhona okutshaya amanzi phakathi kwababili laba.
Intatheli ikhulumisane loMnumzana Tholumusa Dube obike ukuba indaba yetshamali le indala.
“Thina asiqali ukumbona elomama lo lapha nanko lamuhla seze wabuya ukuzomembula izigqoko emsebenzini efuna imali.
“Sihlala simbona beme bonke emkotweni sibuze ukuthi nguye unkosikazi angazwakali simkhuze ukuthi into ayenzayo izamchithela umuzi.
“Ngikhuluma nje lamuhla kaselalo ucingo olungena ku-WhatsApp ngoba lwathathwa ngunkosikazi wakhe ebambe imlayezo evela kutshamali le,” kulandisa uMnu Dube.
Uqhubekele phambili eveza ukuthi kulezinsuku uMaxwell udlela evalweni ukuthi indaba le ingafika endlebeni zikankosikazi wakhe.
Iphephandaba likazulu libuye lakhulumisana loNkosikazi Sitholakele Ndlovu owayekhona laba ababili bekhuluma indaba yabo.
“Ngazizwela ngezami indlebe itshamali le izonde igane unwabu isithi uMaxwell uselenyanga ezintathu engamuphi imali pho uthi udlani njalo usemcatshela ngoba kasabambeki kumakhalekhukhwini.
“Ubesithi ufuna umholo wakhe uqunywe phakathi ngoba laye ungunkosikazi wakhe njengoba ezithwele lanxa waswela,” kutsho uNkszn Ndlovu.
Intatheli ibuye yakhulumisana loMaxwell oveze ukuthi kalakho angakutsho kuntatheli.
“Mina angilakho engingakukhuluma lani ntatheli njengoba kuthiwa selikwazi konke lowana umuntu yisihlobo sami wayengivakatshele nje ukuzongibona kunzima ukuthi ngithini,” kutsho uMaxwell.
Imizamo yokukhuluma letshamali yehlule ngoba inombolo zocingo zingatholakalanga.
Online Reporter