admin
Yintatheli kaMthunywa
INHLANGANISO ebona ngezokuthuthukiswa komdlalo wenguqu esigabeni seTsholotsho isikhethe umkhokheli omutsha ophiwe umlandu wokudinga imali oluzancedisa amathimu akulindawo.
ITsholotsho District Football Association ikhethe ukuthi ikhokhelwe nguMbuso Moyo kukhetho oluqhutshwe eMbudana Hall ngempelaviki edluleyo.
Kusenjalo, amathimu asacathula kumdlalo wenguqu esigabeni seTsholotsho asekhalela ukudlala kuligi kaDivision 2 ngoba ethi lawo sefuna ukubonakala.
Amaqembu la emelwe yiTsholotsho District Football Association (Tshodifa) abeke isikhalazo sawo kubhodi yenhlanganiso yeZimbabwe Football Association eMatabeleland North, uMthunywa ukuzwile lokhu.
Iligi eqhutshwa yiTshodifa ilamaqembu alitshumi abalisa iBlack Swallows, iSilo GMB, iTsholotsho Pirates, iMedicuf, Ihatshi Elimhlophe, i-Amakhosi, iDinyane, iVuka, iMadona leGreen Warriors.
Kubikwa kungumbono weTshodifa ukuba amaqembu wonke sekumele alungiselele ukuncintisa kumahlandla aphezulu, hatshi ukuhlala edibana wodwa.
“Amaqembu awakhanyi nxa edlala wodwa kuTshodifa. Sifuna ukuthi iZifa lapha eMat North ilalele isikhalazo sethu sokuthi sifuna ukuphathwa njengamathimu akuDivision 2. “Yikho lokhu okufunwa ngamaqembu lapha. IZifa sayitshela njalo salobela umgcinisihlalo weZifa uDennis Tshuma ngalokhu,” kutsho omunye wenkokheli ezisanda kungena kuTshodifa owesabe ukuqanjwa ngoba ethi udaba lolu lusahlafunwa.
Online Reporter