admin
KULENJIVA ebisileminyaka emibili ingafikanga ekhaya evele yasangana ngesikhathi ifika emzini wayo ifica umkayo eqhoqhobelwe ngenye indoda embhedeni eMkoba 13 edolobheni leGweru ngeviki ephelileyo.
UTaviwana Mazuru oleminyaka engu-35 yokuzalwa ubevela kweleSouth Africa lapho asehlala khona ngesikhathi ehlangana lensindabaphenduli le abengayikhangelelanga. Kubikwa uvele wathukuthela wahlasela kanzima indoda ayithole lomkakhe uPatsiki, oleminyaka yokuzalwa engu-37, lomkakhe uJoy Chitapa, bona abafice benqunu.
Konke kuvele kwabheka phezulu ngesikhathi amapholisa eMkoba 1 abehlome ngezibhamu ama-AK47 ngemuva kokuba uMazuru ekhiphe i-stun gun okubikwa ishokha umuntu ngesikhathi nje.
UMazuru uthe okwenzakeleyo yikuthi wahamba ngo-2014 eSouth Africa wangaphenduki kwaze kwafika iviki ephelileyo.
“Besengihlale isikhathi esedlula iminyaka emibili ngingakaze ngibuye selokhu ngahamba kodwa umkami ubehlezi engivakatshela. Ngibuye ekhaya ngemuva kokuba izihlobo labangane bami bengitshele ukuthi unkosikazi wami usejola lomakhelwane uPatsiki.
“Ngesikhathi ngifika endlini uChitapa unqabile ukuvula umnyango ngasengigqekeza ngabulala ifasitela ukuze ngingene.
“Ngesikhathi ngingena uPatsiki uzame ukubaleka kodwa ngamgwenxa wawela phansi ngase ngimtshaya ngesibhakela andubana ngimshoke nge-stun gun sami. Umkami ube esebiza udadewabo uKundai olipholisa eMkoba 1 ofike lenqwaba yamaphoyisa abehlomile ezongibopha ethi ngithwele isibhamu,” kutsho uMazuru.
UMazuru ubotshiwe kodwa uPatsiki loChitapa balisula icala ngemuva kokuba uPatsiki encenge lezi zithandani ngokuthi icala lizawumotsha umtshado wazo. — Ubulembu
Online Reporter