admin
YiNtatheli kaMthunywa
IQEMBU leOrlando Pirates selithenge omunye umdlali wakuleli uNyasha Munetsi okubikwa uzadlalela abafana beSoweto okwamampela kusukela ngesizini ezayo.
Umdlali lo usayine isivumelwano esibiza imiliyoni yamarandi. UMunetsi uzakuba ngumdlali wesibili ophuma eZimbabwe kuqembu leOrlando Pirates. UTendai Ndoro ngomunye osehluphisile kwezinkulu zaseSoweto.
Umbiko ophuma esigodlweni eHarare ekolitshini elilolonga abadlali abasakhulayo eleFriendly Academy, kubikwa uMunetsi, oleminyaka yokuzalwa elitshumi lasitshiya galolunye, usayine isivumelwano sokudlala ngoMvulo.
Umdlali lo wanikezwa ibizo elithi “Yaya” ngoba bethi udlala ibhola elifana xathu lelika Yaya Toure, umdlali wase-Ivory Coast.
Ikolitshi leFriendly Academy leli likhokhelwa nguRichard Solobela.
UMunetsi ubedlala kuligi yeNational First Division kuqembu leFC Cape Town. Umdlali lo wake wadlalela njalo amaYoung Warriors kuma-Under 17.
Ekhuluma ebulenjini, uMunetsi uthe uzizwa elokuthaba ukuthi useyingxenye yeqembu elikhulu njenge-Orlando Pirates.
“Ngizizwa ngiphezulu kwamayezi. Kuhle sibili ukuthi sengibizwa njengomdlali weOrlando Pirates iqembu elilembali njalo elihlonitshwa umhlaba wonke.
“Ngibonga abanye abadlali engangilabo kanye lenkokheli ezingivulele indlela yokuthi ngingene kuleliqembu.”
Online Reporter