admin
YiNtatheli kaMthunywa
UMLINGISI womdlalo wakumabonakude iSibaya esitshengisa ku-Mzansi Magic uphose waluchitha esitokisini uSuku lweNkululeko i-Freedom Day ngezinsolo zokubhaxabula unkosikazi wakhe.
Lo mlingisi ogama lakhe lokuzalwa ngu-Andile Gumbi odlala indawo kaZweli ubotshwe ngoMvulo owedlule.
Okhulumela amapholisa uDaniel Mavimbela uqinisekise ukuthi leligeza lensizwa labotshwa lethweswa icala lokutshaya ngenhloso yokulimaza.
U-Andile ophinde asine ahlabelele akatholakalanga ukuze akhulume elakhe icele ngaloludaba kukanti lemibuzo ayithunyelweyo kazange ayiphendule kwaze kwashaya isikhathi sokudindwa kwephephandaba.
I-Sunday World ikholwa ukuthi lumlingisi weThekwini eKwaZulu-Natal owake wadlala ku-The Lion King phetsheya kolwandle usolwa ngokutshaya isinqandamathe sakhe ngenqindi kulandela ingxabano.
“Babesemzini wabo ngesikhathi bezixoxela u-Andile wabe esecasuka,” kutsho umthombo osondelene lalezi zithandani.
Kukholakala ukuthi lezi zithandani zabalengxabano u-Andile wase edudula unkosikazi wakhe waphuma ngomnyango emzini wabo oseDouglasdale, eRandburg.
Kuzwakale ukuthi wabuya lowesifazane okukholakala ukuthi ungumakhwapheni wakhe ngosuku olulandelayo ekuseni.
“Okwenziwa ngu-Andile kwakuyikudelela, ukuthi afike lomuntu wesifazane emzini wabo. Unkosikazi wakhe wabe esembuza ngalo wesifazane u-Andile wathukuthela.
“Ngesikhathi ebuya umnyango wawukhiyiwe, wangena ngodli phakathi wase emtshaya ngezibhakela emhlane wamhudula phansi waqeda waqoqa izimpahla zakhe wahamba,” kutsho lomthombo.
Kwavulwa icala esiteshini samapholisa eDouglasdale, u-Andile wabotshwa wavela laseNkantolo kamantshi weRandburg ngoLwesibili.
U-Andile wadedelwa ngemuva kokuvela enkantolo.
UVimbela uthe lesi sihlabani sizaphinda sivele enkantolo kumaviki azayo ngemuva kokuhlehliswa kwecala ukuze kuzoqhutshekwa lophenyo.
Online Reporter