admin
UMNUMZANA Paul Nyamunda (46) ohlala eSoshanguve, indawo esenyakatho yeTshwane kwele South Africa uthi umuthi wakhe ivukavuka usiza imitshado eminengi.
Ngokutsho kukaNyamunda umuthi lo uyisihlahla esesilesikhathi eside sisetshenziswa ngamadoda angani alamaqolo angaqinanga njalo azizwa engalangazeleli ukuhlangana labomkabo.
UNyamunda uthe umuthi wakhe uyiviagra yesintu ngokwayo. Uthe waqala ukuthengisa umuthi wakhe lo eceleni komgwaqo kuminyaka emibili edluleyo.
“Manengi amadoda adinga usizo kimi uma endlini yokulala kungasavuthi mlilo. Amadoda la ayazi ukuthi angeza kumi ngeke ngiwabuze imibuzo eminengi kakhulu kumbe ukuwahleka ngoba ngiyazizwisisa inkinga ahlangana lazo mihla lemihla,” kutsho uNyamunda.
“Ngiyenelisa lokwelapha abalemikhuhlane ethelelwana emacansini ngevukavuka le.
“Inengi lamadoda liyabe selilemikhuhlane le kodwa lisehluleka ukubikela omkabo kumbe ukuya ekilinika ngenxa yenhloni kodwa banganatha umuthi wami ngemva kwensuku ezimbili nje bayabe sebesilile,” nguNyamunda lo.
UMnumzana Jerry Mabaso (54), ubikele iphephandaba le Daily Sun ukuthi unatha ivukavuka ayithatha kuNyamunda kabili ngomnyaka.
“Ngingayinatha livukavuka ngizwa sengiyindoda qho. Igazi lami lihle liqale ukugijima njalo ngiyenelisa ukusuthisa umkami.
“Njengemota, isitho sami laso kumele sihlale sisiyalungisiswa ngemva kwesikhathi. Nxa sesingani kasiselamandla njalo ngizizwa ngidinwa masinyane ngihle ngazi ukuthi sokuyisikhathi sokunatha ivukavuka. Abantwabami ngizabatshela lindaba ukuze benelise ukugcina imizi yabo,” kutsho uMnu Mabaso. — Ubulembu
Online Reporter