admin
Ncekwenhle Ncube
NJEGOBA isikhathi seKhusimusi sesifikile njengenhlalayenza uSodolobho wakoBulawayo seqalisile ukuqoqa izipho zabaswelayo kanye lentandane.
Umkhankaaso lo uvulwe ngokusemthethweni ngoLwesihlanu kuviki ephelileyo eCity Hall koBulawayo lapho obekulenhlanganiso ezitshiyeneyo lezizalwane zakuleli.
Ekhuluma emkhosini lo uSodolobho uKhansila Martin Moyo uchaze ukuthi ukuqoqa impahla zeKhisimusi zalabo abadubekayo lezintandane yinto abayenza minyaka yonke.
Uthe nyakenye babehlose ukuba le$100 000 kodwa lonyaka abakabi lesilinganiso semali abayikhangeleleyo lanxa befisa ukuthi idlule kuleyo.
Ubuye wengeza unxuso lwakhe ebantwini bakoBulawayo labosomabhizimusi ukuthi baphe lokho abalakho okungasiza intandane, asebekhulile kanye labaswelayo.
Phakathi kwenhlanganiso ebezikumkhosi lo iCoghlan and Welsh inikele i$1 000 ukuze iphathise abahluphekayo.
Ezinye inhlanganiso zithumeze imali ebhanga. UKhansila Moyo ubuye wagcizelela ngamazwi awacaphune ebhayibhilini aqondisa abantu ukuthi kumele banakekelane nxa besaphila emhlabeni.
“UNkulunkulu uzathi kuwe wangibona ngilambile wangincitsha ukudla, wangibona ngomile awuzange ungiphe amanzi.”
Ngalawa amazwi uchaze ukuthi uNkulunkulu ufisa ukuthi lowo lalowo otholayo kumele ancedise abaswelayo ngoba kusasa uzaludinga usizo lukazulu njengalokhu laba abagcinwe zinhlanganiso beludinga.
Kubikwa impahla lezi zizakwabiwa nxa amalanga ekhisimusi esesondele. Lokhu kuzenza intandane labahluphekayo bazizwe bamukelekile emphakathi njalo bejabule labanye.
Unxuso lwengeziwe lakulabo abangazuzanga ithuba lokuyahlangana labanye ngoLwesihlanu. Uthe bonke abafisa ukuphathisa ngezipho kumbe ngemali bengavatshela emawofisini eKhansili yakoBulawayo.
USodolobho uphethe ngokufisela izakhamizi zakoBulawayo ikhefu elilokuthula lentonkozo.
Online Reporter