Lovemore Dube
IQEMBU elincintisa ukuthi libuyele kuPremier Soccer League ngemva kweminyaka emithathu lidlala kuzinga eliphansi, iHwange, lixegisile ngokuba ngutshiki lobhanqa leNkayi United ngeSonto edluleyo.
IHwange yayihambe kumpelaviki ikhokhela ngemiklomelo emithathu njalo ibidinga ukuthi inqobe ukuze yale ilokhe ikhokhela. Sekusele imidlalo emine ukuthi isizini yePacific Breeze Zifa Southern Region iphele.
Ngemva kokubanjwa yiNkayi, iHwange isele ilemiklomelo engu-67 kukanti elandelayo iTalen Vision yenze amathuba ayo abangcono ngokukhulela iMbizo. Ikhuphukise imiklomelo yayo yaya ku-66, kusitsho ukuthi kuzakuba nzima kumjaho lo.
IJordan eyeFilabusi iyala layo ixotsha zombili ezikhokhelayo izipha ithemba lokuthi nxa kungenzakala kube yiyo ethatha inkezo.)
Isilemklomelo engu- 60 njalo ingeyesithathu kumjaho lo kukanti iNkayi United yehlile yaba ngeyesine ngemva kokubamba iHwange 0-0.
Okwenzakale ngempelaviki edluleyo sokunike abafana beTalen Visuion ithemba lokuthi kungenzakala okunye ngoba sekusele imidlalo emine. Bona balowodwa umdlalo abazathola imiklomelo emithathu etafuleni ngemva kokuphuma kweMosi Rovers kuPacific Breeze Southern Region ngokuswela imali.
IHwange isalelwe yiCasmyn abazadlala layo kulimpelaviki kulandele iBosso90, Bulawayo Warriors leBulawayo City.
ITalen Vision isalelwe yiCasmyn, Bosso90 leNkayi United.
Emsileni iBosso90, Njube Spurs le-Aqua Stars kungani zizaqhubana leMosi Rovers zisiyadlala kubanga likaDivision Two.
Kweminye imidlalo yalimpelaviki eWhite City iNjube Spurs izadibana leKhami United ekhokhelwa nguMorris Mukwiti ebisidla amahabula kumaviki alitshumi adluleyo. IBosso 90 ingqikilane leBulawayo Warriors eWhite City B.
IMbizo, iqembu lamabutho izadlala leBulawayo City ekhaya ibhola phansi njalo ikhokhelwa nguMandisi Nyathi eLookout Masuku Barracks.
INkayi United izadlala leZebra Revolution kuthi iJordan ibe le-Aqua Stars.
Imidlalo elandelayo:
Casmyn v Hwange (Turk Mine), Njube Spurs v Khami United (White City Arena), Imbizo v Bulawayo City (Lookout Masuku Barracks), Blackrock v Zimbabwe Saints (Sinderella), Megawatt v
Victoria Falls Herentals (Chakona), Nkayi United v Zebra Revolution (Chiefs Village), Jordan v Aqua Stars (Mthwakazi).
