Ethel Ncube
IZAKHAMIZI zeDandanda eLupane sezakhe inkamba entsha yamapholisa ezavulwa ngeviki ezayo ngenhloso yokwehlisa ubugebengu obusezigabeni zabo.
Inkamba le, izabizwa ngokuthi yi-Dandanda Community Police Base Station izavulwa yinduna, osamabhizimusi lezakhamizi ngeviki ezayo.
Inkamba ekhona khathesi yikho lapho okuhlala khona amapholisa njalo akulasitokisi okwenza kubenzima ukuthi amapholisa angabopha abantu babavalele ngaphi? Ngokunanzelela lokhu izakhamizi zancedisa zakha inkamba yamapholisa.
Induna uMenyezwa ikhuluma loMthunywa iveze ukuba amacala obugebengu abantu begwazana lokutshontshelana asekhuphukile esigabeni lesi. “Amasela lezigebengu asethwalise nzima izakhamizi osekubangela ukuthi abantu bangabuquthi ebusuku ngenxa yokuhlukuluzwa ngamasela ngoba besazi ukuthi kababotshwa.
“Ngikhuluma nje kulengozi eyake yenzakala ipholisa labopha umuntu laya laye enkambeni wathi esenkambeni wenelisa ukukhupha izankosi wagwaza ipholisa lalimala kabuhlungu. Amapholisa abesebenza nzima ngoba indawo yokusebenzela ingavumi ukuba bavalele izibotshwa ngoba labo belala khonapho.
Inkamba le, izancedisa kakhulu amapholisa ngoba ilesitokisi sokuvalela izigangi lamapholisa lawo azabe elamahofisi abo lapho okuzabe kumangalwa khona amacala,” kubika induna uMenyezwa.
Uqhubekele phambili eveza ukuba inkamba le izancedisa. “Sikhangelele ukuba amacala enziwa ngabantu awokubamba inkunzi lokugwaza abantu ehle ezigabeni zeDandanda ngoba sekulenkamba entsha. Izakhamizi zizasebenza ndawonye lamapholisa ekwehliseni amacala atshiyeneyo njalo inkamba eyakhiweyo iyavuma ukuba bavalele izigebengu ezinengi besalinde ukuya emthethwandaba.
“Ngethula ukubonga kuzakhamizi zeDandanda ngokusebenza ndawonye ekwakheni inkamba yamapholisa sibonge wonke umuntu owaphathisayo ukuze umphakathi wethu uhlale endaweni ephephileyo. Silethemba amapholisa azasebenza ekhululekile engelakwesaba ukuba izigebenga zizafohla zibalimaze kumbe zibaleke zingakayi emthethwandaba,’ kuphetha induna uMenyezwa.
