Ethel Ncube
AMAPHOLISA akoBulawayo abophe amadoda amabili eNew Lobengula ngemva kokutholakala elembanje endlini ezibiza iZWG$60 000.
UFortune Ncube (31) loLikhwa Ndlovu (19) babotshwe ngeSonto ngehola lesibili emini kulandela ukuthola udletshana lokuthi ababili laba bathengisa imbanje endlini yabo. Ngokutsho kwamapholisa, ngesikhathi bebotshwa kwatholakala amaphakethe amancane ayelembanje angu-29 lamakhulu amane.
Imbanje lezi ezatholakalayo zibiza i-ZWG$60 000.
Amapholisa abonge uzulu ngokuwancweba indlebe okuyikho okubangele ukuthi ababili laba babotshwe.
UMsekeli wesikhulumi samapholisa koBulawayo, uAssistant Inspector Thandekile Ndlovu, uxwayise uzulu ngokutholakala, ukuthengisa kumbe ukusebenzisa izidakamizwa eziyingozi lezinto ezingekho emthethweni. “Loba ngubani otholakala elezidakamizwa eziyingozi kumbe izinto ezingekho emthethweni, ezithengisa loba ezisebenzisa, uzabotshwa njalo abhekane lomthetho,” kutsho uAsst Insp Ndlovu.
Abasolwa laba babhekane lecala lokutholakala belembanje ngokungekho emthethweni.
