admin
Thokozile Mbedzi
ZILOKHU zinkemile izakhamizi zakoSibasa eSilalatshani ngemva kokuba elinye ixhegu linathe itshefu lafa ngeviki ephelileyo ngoba litshelwe ukuthi lingumthakathi obangela inhlupho zonke ezisemulini.
Umuyi uMoses Sibanda obeleminyaka engu-78 weFilabusi uthethe impilo yakhe kulandela ukutshelwa ngumkakhe kunye labazukulu bakhe ukuthi nguye umthakathi obangela ukuthi babhekane lenhlupho zonke abaphakathi kwazo njengemuli.
Kubikwa inkulumo le kayizange imphathe uSibanda wahle wadobha igabha letshefu waqonda emasimini lapho afika wayinatha khona.
Ekhuluma lentatheli kaMthunywa omunye wezakhamizi uMnumzana Bongani Mathuthu uveze ukuthi balesithuli ngesiga esibehleleyo esigabeni sabo.
“Silesithuli ngesiga esisehleleyo esigabeni sakoSibasa ngoba ukuzibulala komuntu omdala kuyadanisa. Abazukulu kanye lonkosikazi kamuyi bamtshela ukuba ungumthakathi ligwaze umhlaba.
“Lokhu akumphathanga kuhle umuyi yikho ukuya kwakhe emasimini lapho afika khona wanatha umuthi wokubulala izibungu okuthiwa yi-carbarryl,” kutsho uMnu Mathuthu.
Kubikwa omunye wabazukulu bakhe uLister Moyo wasala elandela uyisemkhulu ngoba embonile ukuba usuke ecunuke kakhulu wamfica evele esebangwa lezibi wamgijimisela esibhedlela.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile ukuthi solufikile ehofisini yakhe njalo uxwayise uzulu ukuba nxa kulokungazwisisani ezimulini badinge abaphathi bezigaba bakhumisane umlotha.
“Udaba lwendoda enathe itshefu yafa solufikile ehofisini yethu ngakho sicebisa uzulu ukuba nxa elohlupho abikele abaphathi bezigaba osobhuku, abalisa, izinduna loba amapholisa ukuze kwenqatshelwe ukulahleka kwempilo,” kuphetha uInsp Ndebele.
Online Reporter