admin
YiNtatheli kaMthunywa
KULEZELAMANI ezife ngemva kokugwazwa ngengqamu ngabanye ezazinatha labo kulwiwa kubangwa inina elithengisa ebhawa eCrossroads endaweni yenduna uMalisa kumaviki amabili aphelileyo.
Isikhulumi samapholisa esabelweni seMidlands uInspector Emmanuel Mahoko uqinisekise udaba lolu wathi lwenzakale mhlaka 29 Zibandlela.
Ababili abedlule emhlabeni nguBlessed Sibanda (25) obehlala ngaphansi kukaSobhuku uNdabambi loHillary Maphosa ohlala ngaphansi kukaSobhuku Simangetha.
U-Insp Mahoko uthe ababili laba babenatha utshwala lamanye amadoda abalisa uTalcott Mupasi (25) lo-Agape Munashe Mupasi (21).
Laba kucatshangelwa ukuthi balesandla ekubulaweni kuka Maphosa loSibanda.
UInsp Mahoko uthe ngesikhathi amadoda la enatha utshwala kwaba lokungezwani phakathi kukaSibanda loTalcott Mupasi kubangelwa ngomunye owesifazane owayephakathi ebhawa le ababemfuna bonke okwabangela ukuthi baqale ukulwa.
“Ngesikhathi sokukhala izibhakela phakathi kwamadoda la amabili u-Agape Munashe Mupasi laye wayithenga indaba wangenela waqala ukutshaya uSibanda.
Ngaleso sikhathi kubikwa uTalcott wahwatsha ingqamu esikhwameni wagwaza uSibanda emhlane wahle wawela phansi, uHillary Maphosa laye wasondela ezama ukulamulela umfowabo laye wagwazwa nguTalcott,” utsho njalo uInsp Mahoko.
“Omunye njalo owayekhona kusenzakala lokhu uNqaba Ndlovu (26) kubikwa laye wazama ukusiza, uTalcott wahle wamgwaza esifubeni.
“Ababili laba kubikwa babaleka batshiya amadoda amathathu elele phakathi lwechibi legazi.
Amapholisa abizwa athola abathathu laba belokhu belele phansi abathwala abasa esibhedlela seKwekwe lapho uSibanda lo Maphosa abafika bafela khona,” utsho njalo uInsp Mahoko.
Uthe uNdlovu ulokhu esesibhedlela lapho ayelatshwa khona njalo kubikwa usesimeni esibi kakhulu.
Abasolwa kubikwa sebabanjwa ngamapholisa njalo balinde ukuthi icala labo lisiwe emthethwandaba.
“Njengansuku zonke sixwayisa abantu ukuthi balungise okuhluphayo ngokuthula, njalo abesilisa kabatshiyane lendaba zokubanga abesifazane ikakhulu abemabhawa. Ungabona sokunjalo sukuma uzihambele uyedinga omunye.
“Kasiqakathekiseni impilo yomuntu njalo abesifazane labo kabangathandani labantu abanengi,” kuphetha uInsp Mahoko.
Online Reporter