Online Reporter
Fungai Muderere
OWAYENGUKAPUTENI wamaWarriors uDanny “Deco” Phiri usebizwe liqembu elidlala kuZimbabwe Football Association (Zifa) Central Region Division One, iGwanda Pirates.
Lokhu kuvezwe ngumqeqetshi weGwanda Pirates uJohannes Ngodzo.
“Siludinga kakhulu ulwazi lwakhe (uPhiri) eqenjini lethu. Ngiyajabula ukuthi uvumile ukuzodlala kithi. Njengeqembu sidinga ukujula okukhulu ukuze sidlalele ukuthi sithole ukunqoba kumidlalo yonke,” kutsho uNgodzo.
UPhiri (35) ulesikhathi eside edlala inguqu. Usedlalele amaqembu agoqela iRailstars, Chicken Inn leBantu Rovers. Uveze ukuba ulethemba lakhe lokuthi uzakwenza kuhle kuGwanda Pirates.
“Kunginikeza ingqobe yokuthi ngizimisele enkundleni. Ngalokho ngiyazethemba. Ngizabagcwalisela. Konke kumayelana lokuba ngumdlali osebenza kuhle labanye abadlali lokwenza isiqiniseko sokuthi ngidlalela ukuthi sithole imiklomelo yonke,” kutsho uPhiri.
Kulandela ukukhululwa kwakhe yiChicken Inn ngaphambi kokuqala kuka-2025, uPhiri ukholelwa ukuthi inyawo zakhe zisasebukhali.
UPhiri ubuyele kuGamecocks ngomnyaka odluleyo ngemva kwesizini eyodwa ekuBulawayo Chiefs.
Ungene kuMakhosi Amahle ngemva kokuhlukana leGolden Arrows yeSouth Africa, iqembu afike kulo ngemva kokusuka kuGamecocks ngo-2016. Wadlala imidlalo engu-97 eseBafaneni Bes’thende, etshibilika eyimvimbi evala esiswini senkundla.
KuGolden Arrows, uPhiri ubengomunye wabadlali abane abakuleli ababalisa uKudakwashe Mahachi, uDevine Lunga loKnox Mutizwa.
Abadlali laba babehlala bekuqembu lakuqala ku-Arrows. UPhiri ubengomunye wabadlali abambalwa ababedlala kuleli ukuthi badlale kuqembu lamaWarriors ku-Africa Cup of Nations. Wathwala inkezo yeligi ku-Castle Lager Premiership iqembu liqeqetshwa nguJoey Antipas ngo2015.
Ngaleyo sizini, waphiwa isicoco seCastle Lager Soccer Star of the Year. I-Chicken Inn yalowo mnyaka yayilabadlali ababalisa uTafadzwa Kutinyu, Clemence Matawu, Lawrence Mhlanga, Thomas Chimenya, Guide Goddard, George Majika, Passmore Bernard loThabani Goredema.
Abanye abadlali bodumo, abake badla ubhedu kuligi ephakemeyo kuleli abathengwe yiGwanda Pirates nguJoel “Josta” Ngodzo loWelcome “Waroowa” Ndiweni.
I-Gwanda Pirates isibeliqembu elibatshazwa endaweni ezinengi ngenxa yokugcwala kwayo enkundleni zokuxhumana, ikakhulu kuFacebook.
