Online Reporter
Bhekimpilo Tshalibe
KULAMALOJA elokitshini leCowdray Park koBulawayo amane, okubikwa athelele umasitanda wawo ambhaxabula, ezondele ukuthi kungani ebuze imali yerenti.
Amaloja la, amanina amabili lendoda eyodwa athi uMathias Dube oleminyaka engu-65, Thanduxolo Gumbo oleminyaka engu-22 loEmma Mlauzi oleminyaka engu-38, betheswa icala lokutshaya umasitanda wabo ngoba ebuze imali yerenti.
Mhlaka 1 Mbimbitho kuwonalo umnyaka, abathathu laba baxabana lomasitanda wabo, uElizabeth Banyai owayefuna imali yakhe yerenti.
Kubikwa uBanyai esebuze imali yerenti wezwa abathathu laba bephendula kubi, wathi usekhiya indlu yakhe omunye wabo wamtshaya ngempama, omunye wamdonsa izigqoko zaze zadabuka wasala eseze. Kukanti omunye wayemtshila isandla.
Umsolwa wesine, uMlungisi Dube olokhu esadingwa ngamapholisa kubikwa umasitanda wathi esesiyamangala emapholiseni wamvimbela endleleni, andubana amhluthunele umakhalekhukhwini wohlobo lweSamsung A06 ayemsebenzisa ezama ukutshayela amapholisa.
Sengathi kwakungenelanga, kubikwa uDube wabuye wambamba amabele wamtshaya ngempama andubana abulale umakhalekhukhwini wakhe.
Umsolwa wesibili uGumbo laye wabuye walandela umasitanda esiya enkambeni yamapholisa, wamfica eSign Post wamtshaya ngempama andubana amthathele umntwana ayemthwele.
Abathathu laba bamiswe emthethwandaba weWestern Commonage, phambi kukamantshi uMnumzana Archie Wochiwunga, besetheswa icala lokutshaya umasitanda.
Umantshi uthe abathathu laba babuyele ngekhaya esakhangelisisa indaba le, njalo bazathunyelwa amasamanisi nxa sebefuneka emthethwandaba.
