admin
#EDelivers
#FiveMoreYears
#Devolution
YiNtatheli kaMthunywa
PHAKATHI kwawo wonke amakhansili eZimbabwe, iHwange Local Board isisebenzise kuhle imali yeDevolution Fund ngokwakha lokuvuselela izakhiwo ezisetshenziswa ngumphakathi.
Lokhu kuvele ngemva kokuvakatsha okwenziwe liqula leProvincial Devolution Monitoring and Evaluation sub-committee kunsukwana ezisanda kwedlula.
Ikhomithi le ithe kuyancomeka ukuzimisela kweHLB, yabika ukuthi amanye amakhansili kumele enze okufanayo.
IKhansili yeHwange kusukela ngomnyaka odluleyo isiyakhe ikilinika elokitshini leMpumalanga, ivuselele imigwaqo lokulungisisa impompi zayo lezititshi zamanzi lalezo eziphatha ingcekeza yesambuzi.
Okwamanje iphezulu kokwakha isikolo sabantwana i-Early Childhood Development (ECD) eNechibondo Primary, elokitshini leMpumalanga.
Ukwakhiwa kwesikolo lesi, kuze ngesikhathi uHulumende okhokhelwa nguMongameli uEmmerson Mnangagwa eqinisekise ukuba imali zesikhwama se-Devolution Fund zisetshenziswe kakuhle.
Kumbiko wakhe ngokwakhiwa kwezikolo eHwange, umgcinisihlalo weHwange Local Board uKhansila Nqobile Ocean Mabhena uthe bazasekela uhlelo lukaHulumende lokuletha inguquko ngesikhwama se-Devolution Fund.
“Okubalulekileyo yikuletha ingqubekela phambili sisebenzisa imfundo,” kutsho uMnu Mabhena.
Ayizange ikufihle iKhansili yeHwange ukuba izizwe ziphakanyisiwe ngemisebenzi esiqhutshwe ngesikhwama se-Devolution Fund.
“Izethekeli zethu, iProvincial Devolution Monitoring and Evaluation sub-committee isibuke imisebenzi yeHwange Local Board, yacebisa amanye amakhansili ukuthi enze okufanayo,” yiKhansili le isethula umbiko wayo kuTwitter ngoLwesibili.
Online Reporter