Online Reporter
Siphathokuhle Ngulube
Salibonani bafundi. Ngithemba liqhuba kuhle ezifundweni zenu. Kuleli iviki sivulile izikolo, singadlalisi amathuba siqale nje ukusebenza nzima sisavula nje. Sikhumbule ukuthi kuleli ithemu sizabhala amazamanishini.
Kuviki ephelileyo sixoxile kabanzi ngokukhethwa kwesihloko sesichwayisiso. Sitshilo ukuthi kufanele uhlale phansi udle amathambo engqondo ungakaze ukhethe isihloko. Okunye esikubalisileyo yikuthi kuhle ukhangele uhlupho endaweni ohlala kuyo ukuze phela wenelise ukuthola izimbangela kanye lezisombuluko zalolohlupho masinyazana hatshi ukuyakhatshana lapho ozacina usehluleka ukuyafika khona ukuze uthole ulwazi olunengi ngalo.
Okunye njalo esigxile kukho ngeviki ephelileyo yikho konke nje okudingakala kusigaba sakuqala sesichwayisiso. Sitshilo phela ukuthi izichwayisiso zilezigaba eziyisithupha. Namuhla sizagxila kakhulu kusigaba sesibili (Stage 2). Lesi isigaba silomsebenzi omkhulu kakhulu njalo sidinga ukuba umfundi asebenze nzima.
Lapha yikho okukhangelelwe ukuba umfundi adinge ulwazi olutshiyeneyo mayelana lesihloko abhala ngaso. Umfundi usengasebenzisa izindlela ezinengi zokuthola ulwazi ngesihloko sakhe.
Okokuqala umfundi angabala izingwalo ezitshiyeneyo edinga ukuba azwe ukuthi abanye abalobi bathini ngesihloko sakhe. Usengadobha okumbalwa akuncindezele phansi. Okunye angakwenza yikungena ebulenjini adinge njalo ukuthi kuvelani ngesihloko sakhe.
Asithi umfundi isihloko sakhe siphathelane lokuqakatheka kokudla kwesintu, usengadinga ukuthi abanye abantu bathini ngokuqakatheka kwalokho kudla. Esetholile lolo lwazi umfundi uyaluncindezela phansi aluhluze kabanzi eqathanisa nje lokho akutholileyo.
Okunye njalo umfundi usengaxoxisana labantu abatshiyeneyo edinga ulwazi. Asithi udinga ukuqakatheka kokudla kwesintu, usengaxoxa labantu abadala abalolwazi ngokudla kwesintu. Umfundi usengabuza lokhu lalokhuyana injongo yakhe kuyikuthola ulwazi ngokuqakatheka kokudla kwesintu.
Embuzweni yakhe umfundi kumele ajonge ukuthola ulwazi olumqoka ngesihloko sakhe. Okunye njalo umfundi angasebenzisa amagwaliba alemibuzo ethile ajonge ukuba izimpendulo zemibuzo zimnike ulwazi oluthile ngesihloko sakhe (questionnaires). Ngalokho-ke bafundi zinengi izindlela zokudinga ulwazi umfundi angazisebenzisa kusigaba sesibili sesichwayisiso.
Ulwazi azaluthola kulesi isigaba luzamsiza ukuba aqhube njani esiyaphambili ngomsebenzi wakhe. Lolu lwazi njalo luzamnceda ekudingeni isisombuluko sohlupho achwayisisa ngalo.
Ngithemba siyananzelela bafundi ukuthi isigaba sesibili sidinga ukuba uchwayisisa kabanzi njalo uhluze ulwazi ngesihloko sakho. Asiqhubekeni ngeviki elizayo.
