Online Reporter
Ethel Ncube
INHLANGANISO yezokulima eye-Agritex isiveze ukuba ikhabitshi iyalimeka ngesikhathi somqando kungakho abalimi bangazilimela yona bazitholele inzuzo.
Umlimisi, uNkosazana Sikhanyiso Ndlovu ongumlimisi e-Agritex ubike ukuba abalimi bangazilimela ikhabitshi ngesikhathi somqando ngoba iyavuma.
Ekhuluma lephephandaba likazulu, uNkszn Ndlovu uthe abalimi abesaba ukuthi izilimo ezinengi ziyatshazwa ngesikhathi somqando bangalima ikhabitshi.
“Isikhathi somqando sesifikile, abalimi abanengi badidekile ngokuba bazalima njani ngoba umqando ulakho ukuphazamisa izilimo zabo. Kodwa abalimi bangazilimela ikhabitshi ngoba yisilimo esingahluphiyo. Kayidingi amanzi amanengi,” kutsho uNkszn Ndlovu.
Uthe ikhabitshi nxa ilinywa kumele imbheda yakhona ibe yi-1,5metres kuthi kulowo mbheda kumele isilimo sinye ngasinye sehlukane nge-50cm kusiya ku-60cm.
Uthe okuqakathekileyo ekulimeni ikhabitshi yikubona ukuthi nxa kudingeka ukuba ifafazwe imithi efunakalayo, ibe ikhona.
“Umlimi okumele akwenze yikuhamba ezitolo ezithengisa imithi yezilimo ayedinga imithi efaneleyo, ukuze avikele izilimo zakhe, zingahlaselwa yizibungu.
“Kumele abone ukuba ngazo zonke izikhathi uyakhupha ukhula ezilinyweni zakhe ngoba lulakho ukwehlisa izinga lesivuno ngoba ukhula lucina luncintisana lezilimo ekukhuleni, zicine zingakhuli kuhle,” kuphetha uNkszn Ndlovu.
