Online Reporter
Ethel Ncube
INDUNA uGampu yeTsholotsho isiveze ukuba kuyaphuthuma ukuba izakhamizi zifundiswe ngokuqakatheka kokunakekela kanye lokuvikela abakhubazekileyo kulandela ukuvela kwemibiko eminengi eveza ukuba banengi abakhubazekileyo abahlukunyezwa ngokocansi emakhaya.
Induna ithe lokhu kuyakhathaza ngempela ngoba ezikhathini ezinengi abantu abakhubazekileyo abenelisi ukuzivikela kumbe ukuzikhulumela ukuba benziwa okuthize okungalunganga emizimbeni yabo. Ithe esikhathini esinengi abantu laba bacina bethelelwa imikhuhlane ethelelwana emacansini.
Kungxoxo induna uGampu ebelayo lentatheli induna itshengisele ukukhathazeka ngalokhu okwenzakalayo ebantwini abangenelisiyo ukuzivikela kumbe ukuzilwela.
Uthe abantu kabathathe amanyathela okubona ukuthi bayavikela izihlobo zabo ezingabe zikhubazekile.
“Abantu kumele baziphe umlandu wokugcina abakhubazekileyo kuhle. Ezigabeni zami sokulokuganga thize, abantu bayahlukumeza abakhubazekileyo ngokocansi kumbe abagula umkhuhlane wengqondo qede babathelele imikhuhlane etshiyeneyo.
“Lokhu yinto ebuhlungu kakhulu kungakho ngithanda ukukhuthaza abantu ukuthi bekele ukwenza ihlazo elingaka.
“Ngikhuluma nje kulomfana owahlukuluzwa ngokocansi wathelelwa ingulamakhwa ngumuntu wahanjiswa esibhedlela kwathiwa isimo akiso sesifuna izibhedlela ezinkulu wadluliselwa koBulawayo.
“Okwakhathesi ulaliswe esibhedlela, akwazakali ukuthi ngubani owayethatha umfana lo amenze ubaba, khathesi usegula lomakwenza lokhu kumele elatshwe kodwa uzafihla aqhubeke elokhu ethelelela abanye,” kubika induna uGampu.
Uqhubekele phambili eveza ukuba izakhamizi zilomlandu wokuvikela abantu laba.
“Ngiyakhuza njalo ngiyacela kuzakhamizi ukuba asibeni ngabantu sitshiye umkhuba wokuhlukumeza labo abangenelisiyo ukuzivikela. Asibanakekeleni hatshi ukubahlukumeza.
“Izihlobo lazo ezigcine abantu laba lazo ziyabahlukuluza. Asizinikeni umlandu wokuthi siyabagcina kuhle singabahlukuluzi,” kuphetha induna uGampu.
