Online Reporter
Zimpapers Sports Hub
UMQEQETSHI weChicken Inn, uJoey Antipas, ubike ukuthi ubona kungcono ukuthi iqembu lakhe lidlalele eBarbourfields ngoba eLuveve kuyehlula.
Ucabange lokhu enanzelela ukuthi akulanto ephumayo enkundleni yeLuveve, elikhaya lamaGamecocks. Ngemva kwemidlalo elitshumi lambili, iChicken Inn idonsa nzima njalo kayikanqobi nxa isekhaya.
“Sehluleka ukwenza kuhle nxa sisekhaya. Ngakho-ke, kumele sihlale phansi sidinge amaqhinga amatsha.
“Mhlawumbe singaya eBarbourfields Stadium kungaba lotshintsho ngoba siyehluleka eLuveve,” ngu-Antipas lo.
Uthe ufuna ukuqinisa iqembu lakhe ngesikhathi isizini isifike kungxenye yemidlalo.
“Nxa ifasitela lesizini livulwa sizaqinisa iqembu ngabadlali abatsha, ikakhulu abagadli ngoba yikho lapho esehlukela khona.
“Kwesinye isikhathi, emdlalweni eminengi siyajaha ukukhaba ibhola sicine sililahla. Kumele sizibambe,” kutsho u-Antipas.
IChicken Inn isanda kwehlisa umsekeli ka-Antipas uFungai “Tostao” Kwashi isikhundla, bemusa eqenjini elikuZifa Bulawayo Province Division Two.
UKwashi wangena kumaGamecocks ngesizini edluleyo esuka kuCAPS United, engena kumsebenzi owawubanjwe nguPrince Matore.
Unobhala weChicken Inn, uTavengwa Hara kazange afune ukuthi bhadla ngokutshintsha inkundla okuvezwe ngu-Antipas.
“Sizakhupha umbiko ngotshintsho oluzakuba khona kusukela kumaqembu ethu abasakhulayo lakuqembu elikhulu.”
IChicken Inn isinqobe kabili, yabangutshiki lobhanqa kasithupha, yanqotshwa kane, kumidlalo elitshumi lambili.
Yanqoba kuDynamos leKwekwe United.
Kusenjalo, umdlalo weChicken Inn leScottland olandelayo kulimpelaviki uzaphuma kumabonakude weZTN Prime (Channel 294 kuDStv).
Imidlalo yeCastle Lager
kulimpelaviki:
NgoLwesihlanu: Scottland v Chicken Inn (Rufaro)
NgoMgqibelo: Kwekwe v Telone (Bata), Greenfuel v MWOS (Greenfuel); Ngezi Platinum v Dynamos (Baobab); Bikita Minerals v ZPC Kariba (Gibbo); Yadah v FC Platinum (Heart)
NgeSonto: Caps United v Simba Bhora (Rufaro); Triangle United v Manica Diamonds (Gibbo); Highlanders v Herentals (Barbourfields)
