Online Reporter
Ethel Ncube
UMHLABELELI wakoMahlabayithwale uJaycee owazakala kakhulu ngengoma yakhe ethi Ungayithi vu usebangenile kwezomculo ngokukhipha enye ingoma entsha esebenzisana lomculi kamaskandi uZinjaziyamluma.
UJaycee loZinjaziyamluma bahlabele bonke ingoma entsha ethi Isicelo.
Ekhuluma lentatheli uJaycee ubike ukuba ubonga abalandeli labancedisileyo ekutheni bakhuphe ingoma entsha.
“Ngikhiphe ingoma eyodwa ngihlangene loZinja kanye lomunye umhlabeleli weSouth Africa, eDurban. Ukuhlabela kwethu sindawonye omunye evela koMahlabayithwale, omunye eZhwane kanye leMzansi kutshengisa ukubambana singabahlabeleli. Ngibonge ukuba sikhipha idlalade leli uzulu indlela asisekele ngayo le iyasiqinisa njalo isipha amandla okuba siqhubekele phambili ngomculo,” kutsho uJaycee.
Ubuye wethula ukubonga okukhulu kwabamncedisayo ukuba lingoma iphume.
“Ngethula isibongo sami kuChief Executive Officer we-Imbesu owancedisayo ukuba ingoma iphume ngibuye ngibonge lomhlabeleli odumileyo uZinjaziyamluma wenza ingoma yami ibe lomfutho kakhulu. Ngethule isibongo njalo kubalandeli bami, ngiyalibonga kakhulu ngosekelo lwenu, yini elingiphakamisayo.
Ngithi kubalandeli asimanga ngomculo, siyaphambili. Ingoma ngeyenu njalo iyasibambanisa sonke singabakoGodlwayo labeZhwane, siyabonga balandeli. Umculo uyatholakala enkundleni zokuxhumana, landelani lizizwele ubunandi obukhona,” kuphetha uJaycee.
