Online Reporter
Ethel Ncube
KULENDODA yelokitshini leGwabalanda koBulawayo ebanjwe ilezihlahla zembanje ezingu-103 esivandeni sayo ngoLwesihlanu ngeviki ephelileyo.
UMichael Silas oleminyaka engu-23 yokuzalwa utholakale elezihlahla kanye lenhlanyelo yembanje ngamapholisa abethole udletshana lokuba uzilime esivandeni sakhe.
Kuzwakale ukuthi amapholisa esethole udletshana lolu, ahamba ayahlola amfica elele ku-cabin bathola ibhokisi lomentshisi lilentanga zembanje bathi besuka lapho baqonda esivandeni lapho abafica kulezihlahla ezingu-103 zembanje bahle bambopha bamusa enkambeni yamapholisa eLuveve.
Intatheli ixhumane lesikhulumi samapholisa koBulawayo uInspector Nomalanga Msebele obike ukuba indaba enjalo isezandleni zamapholisa.
“Sibophe uMichael Silas osolwa ngecala lokuhlanyela imbanje kunye lokutholakala elentanga zembanje.
“Sibonga indlela uzulu asebenzisana ngayo lamapholisa. Asibuyeli emuva ekulwisaneni lokusentshenziswa kwezidakamizwa, wonke ophatheka kikho uzabotshwa,” kutsho uInsp Msebele.
